کولمبو ۔24 ستمبر(سیاست ڈاٹ کا م) ایشیا کپ میں سری لنکائی ٹیم کی ناقص کارکردگی پر اینجلو میتھیوز کو کپتانی سے ہٹادیا گیا اور انگلینڈ کے خلاف سیریز میں چندیمل ٹیم کی قیادت کریں گے۔سری لنکن کرکٹ بورڈ نے ایک بیان میں کہا ہے کہ سلیکٹرز نے اینجلو میتھیوز سے فوری طور کپتان کی حیثیت سے ذمہ داریاں چھوڑنے کوکہا ہے۔بیان میں یہ نہیں بتایا گیا کہ میتھیوز کو کیوں کپتانی سے برطرف کیا گیا تاہم ایشیا کپ میں کپتانی کے حوالے سے میتھیوز کو شدید تنقید کا سامنا تھا۔سری لنکائی ٹیم ایشیا کپ 2018ء کے گروپ میچز میں افغانستان اور بنگلادیش کے خلاف شکست کے بعد ایونٹ سے باہر ہوگئی تھی۔افتتاحی میچ میں بنگلادیش نے سری لنکا کو 137 رنز کے بڑے فرق سے شکست دی تھی۔چندیمل پہلے ہی سری لنکا کی ٹسٹ ٹیم کے کپتان ہیں اور اب وہ تمام طرز کی کرکٹ میں ٹیم کی قیادت کریں گے۔سری لنکا کے 10 اکتوبر کو شروع ہونے والے دورہ انگلینڈ کے دوران پانچ ونڈے ، ایک ٹی 20 اور تین ٹسٹ میچز کھیلے جائیں گے۔
