پیرس ۔18 جولائی (سیاست ڈاٹ کام) ورلڈکپ فٹ بال 2018 کا تاج اپنے سرپہ سجانے والی ٹیم فرانس کے اسٹار کھلاڑی کائلین مباپے نے ورلڈ کپ کی اپنی تمام تر آمدنی فلاحی ادارے کوعطیہ کرنے کا فیصلہ کرلیا ہے۔ورلڈ کپ میں بہترین نوجوان کھلاڑی کا اعزاز پانے والے مباپے کی آمدنی کھیل کے لیے کام کرنے والے فلاحی ادارے ’پریمئرز ڈی کورڈی‘ کو جائے گی جو معذور اور بیمار بچوں کے لیے کام کرتا ہے۔اسپورٹس السٹریٹڈ کے مطابق نوجوان کھلاڑی کو ورلڈ کپ میں 265000 پائونڈز کی آمدنی ہوئی جو بونس کے بعد 384000 پائونڈز ہوئی ہے جبکہ انہیں ورلڈکپ میں ایک میچ کے 17000پائونڈز ملتے تھے۔19سالہ نوجوان مباپے کی مدد سے فرانس نے ورلڈکپ کے فائنل میں حریف کروشیا کے خلاف 2-4 سے کامیابی سمیٹی، مباپے نے کروشیا کے خلاف ورلڈکپ کا آخری گول اسکور کیا اور ٹیم کو فتح دلانے میں اہم کردار ادا کیا۔ورلڈ کپ میں مباپے کی کارکردگی اچھی رہی جہاں انہوں نے 4 گول اسکور کیے اورایونٹ میں وہ ایک ابھرتے ہوئے کھلاڑی کے طور پر سامنے آئے جبکہ 1958میں برازیلین پلے کے بعد وہ پہلے ایسے کم عمر کھلاڑی ہیں جس نے ورلڈ کپ کے فائنل میں گول کیا۔مباپے تیسرے کم عمر نوجوان ہیں جنہوں نے ورلڈکپ کھیلنے کا اعزاز حاصل ہوا جبکہ اس سے پہلے برازیلی پلے اور اٹلی کے گوئسپی برگومی تھے۔دوسری جانب فلاحی ادارے کے منیجر سبیسٹئن روفن نے کہا ہے کہ کائلین ایک زبردست آدمی ہیں ،جب اس کے پاس وقت ہوتا ہے وہ خوشی سے ہمارے پاس آکر اس وقت کو بچوں کے ساتھ گزارتا ہے جبکہ اس کی بچوں کے ساتھ بہت اچھی دوستی ہے اور وہ ہمیشہ اچھے الفاظوں سے ان کا حوصلہ بڑھاتا رہتا ہے۔انہوں نے مزید کہا کہ کبھی تو ہمیں ایسا لگتا ہے کہ وہ ان بچوں کے آپس میں کھیلنے سے زیادہ خود ان کے ساتھ کھیلنا زیادہ پسند کرتا ہے۔
