گرینوبل (فرانس) ، 8 مارچ (سیاست ڈاٹ کام) ریسنگ کی دنیا کے معروف ڈرائیور مائیکل شوماکر کے ڈاکٹروں کا کہنا ہے کہ انہیں کوما سے باہر لانے کی کوشش جاری ہیں لیکن ان کی حالت میں بہتری نہیں آئی۔ فارمولا ون کے سات بار چمپئن رہنے والے جرمنی کے ریسر 29 دسمبر کو فرانس میں اسکیئنگ کرتے ہوئے ایک حادثے کا شکار ہو گئے تھے۔ انھیں فرنچ ایلپس کے پہاڑی سلسلے میں واقع میربل کے الپائن ریزارٹ میں اسکیئنگ کے دوران سر پر چوٹ آئی تھی۔ اسکیئنگ کے دوران پھسلنے کی وجہ سے شوماکر کا سر چٹان سے ٹکرایا جس سے ان کا ہیلمٹ ٹوٹ گیا تھا۔ شوماکر کے دماغ سے خون کے لوتھڑے نکالنے کیلئے ڈاکٹروں نے انھیں آپریشن کے بعد کوما کی حالت میں رکھا تھا اور اب ڈاکٹر شوماکر کے دماغ کی سوزش کم کرنے کی کوشش کر رہے ہیں۔
