دوحہ ۔ 10 ستمبر (سیاست ڈاٹ کام) قطر کے حکمراں خاندان کے سرکردہ رہنما سلطان بن سحیم آل ثانی نے غیر ملکیوں کو شہریت دینے کی حکومتی پالیسی کو کڑی تنقید کا نشانہ بنایا ہے۔ان کا کہنا ہیکہ قطری لیڈروں کے ہاں غیروں کا مفاد زیادہ عزیز ہے۔ وہ قطری عوام کے بجائے غیرملکیوں کو ترجیح دیتے ہیں۔مائیکرو بلاگنگ ویب سائٹ ’ٹویٹر‘ پر پوسٹ کردہ ایک بیان میں سلطان بن سحیم نے لکھا کہ ’غیر ملکیوں کو شہریت دینے کا سلسلہ جاری ہے۔ اقامے کھلے عام بانٹے جا رہے ہیں۔ قطری عوام کے خلاف قوانین وضع کئے جا رہے ہیں۔ حکومت کو غیر ملکیوں کا مفاد زیادہ عزیزہے۔ مغرب کی اندھی حمایت کے حصول کے لئے حکومت نے ملک کو غیرملکیوں کی آماجگاہ بنا دیا‘۔ایک دوسری ٹوئیٹ میں انہوں نے لکھا کہ قطری رجیم کو اپنے شہریوں کے مفاد سے کوئی غرض نہیں۔ قطر کے شہری حکومت کے ہاں آخری درجے پر ہیں۔ حکومت صرف مغرب کی جھوٹی رضا اور خوشنودی چاہتی ہے۔ ملک کی سالمیت اور خود مختاری سے انہیں کوئی غرض نہیں۔ وہ یہ سمجھتے ہیں کہ قطر کو آبادی بڑھانے کے لئے غیرملکیوں کو بسانے کے سواء کوئی چارہ نہیں۔ قطر کا اللہ ہی حافظ ہے۔
