میامی۔25 مارچ (سیاست ڈاٹ کام ) عالمی نمبر ایک کھلاڑی سوئٹزرلینڈ کے راجر فیڈرر کو میامی اوپن ٹینس ٹورنمنٹ کے دوسرے راؤنڈ میں آسٹریلیا کے تھناسي کوکناکس کے خلاف 6۔3، 3۔6، 6۔7 سے حیران کن شکست برداشت کرنی پڑی ہے ۔سوئس چمپئن کے لیے گزشتہ چھ دنوں میں یہ دوسری بڑی شکست ہے ، انہیں گزشتہ ہفتے انڈین ویلز فائنل میں یان مارٹن ڈیل پوٹرو کے خلاف شکست برداشت کرنی پڑی تھی۔اس شکست کے بعد فیڈرر اسپین کے رافیل نڈال کے ہاتھوں اپنا نمبر ون مقام بھی گنوانے کے قریب ہیں جو میامی اوپن میں کھیلنے نہیں اترے ہیں۔دنیا میں175 ویں نمبر کے کھلاڑی کوکناکس نے دفاعی چمپئن فیڈرر کو شکست دینے کے لیے بہترین فور ہینڈ کا استعمال کیا جس نے اسٹیڈیم میں بیٹھے تمام شائقین کو چونکا دیا۔یونانی والدین سے پیدا ہوئے21 سالہ آسٹریلیائی کھلاڑی کوکناکس میامی اوپن میں بطور کوالیفائنگ کھلاڑی اترے ہیں لیکن انہوں نے نمبر ون فیڈرر کو شکست دے کر کیریئر کی سب سے بڑی جیت درج کر لی۔20 مرتبہ کے گرانڈ سلیم چمپئن نے اگرچہ میچ کی اچھی شروعات کی تھی اور پہلا سٹ کے چوتھے گیم میں کوکناکس کی سروس توڑی اور آسانی سے پہلا سٹ جیت لیا لیکن دوسرے سٹ میں کوکناکس نے چوتھے گیم میں ٹاپ سیڈ کھلاڑی کی سروس توڑی۔فیصلہ کن سٹ میں 36 سالہ کھلاڑی اور کوکناکس نے میچ میں توازن برقرار رکھا اور ٹائي بریک میں بھی برتری پر رہے ۔لیکن ان کا دوسرا سرو نیٹ میں جا الجھا۔اسی کے ساتھ کوکناکس اور آسٹریلیائی پرستار خوشی سے جھوم اٹھے اور کریڈن پارک سے فیڈرر کی وداعی ہو گئی۔یادرہے کہ گذشتہ ہفتہ فیڈرر انڈین ویلز میں بھی اپنے خطاب کا دفاع نہیں کرپائے تھے اور انہیں فائنل میں ڈیل پوٹرو کے خلاف شکست ہوئی تھی۔
