باسل۔29 اکٹوبر(سیاست ڈاٹ کام) سوئس ٹینس کنگ راجر فیڈرر ایک مرتبہ پھر کامیاب ہوگئے اور37 سالہ اسٹار نے سوئس انڈور چمپئن شپ جیت لی۔ انہوں نے فائنل میں کوالیفائر ماریوس کوپل کو 7-6 (7/5)،6-4 سے شکست دی۔ گھریلو میدان پر جب 12 ہزار پرستاروں کے سامنے انہوں نے ٹرافی کو چوما تو یہ منظر بہت جذباتی تھا۔ یہ فیڈرر کے کیریئرکا 99 واں اعزاز ہے اور وہ اب تک باسل میں نو مرتبہ چمپئن بن چکے ہیں۔ اس میدان پر فیڈرر لڑکپن میں بال بوائے کے فرائض انجام دیا کرتے تھے اب امریکی سابق ٹینس پلیئر جمی کانرز کے عالمی ریکارڈ کے تعاقب میں ہیں جنہوں نے 109 بین الاقوامی خطابات اپنے نام کیے ۔ عالمی درجہ بندی میں 93 ویں مقام پر موجود رومانیہ سے تعلق رکھنے والے کوپل کا ٹینس کے عظیم اسٹار سے کوئی مقابلہ نہیں تھا لیکن انہوں نے پہلے سٹ میں بہترین کھیل کا مظاہرہ کرتے ہوئے اسے ٹائی بریک تک لے جانے میں کامیابی حاصل کی لیکن دوسرے سٹ میں فیڈرر نے زیادہ بہتر کھیل پیش کیا۔ 151واں ٹینس فائنل کھیلنے والے فیڈرر نے اب تک 20گرانڈ سلام خطابات حاصل کئے ہیں ان کے برعکس کوپل نے کیریئر میں صرف ایک گرانڈ سلام میچ ہی جیتا ہے۔ خطاب کے بعد فیڈرر نے کہا کہ یہ میرے لیے جادوئی ہفتہ تھا۔ ایسا لگا جیسے میں خواب میں جی رہا ہوں۔ دریں اثنا یہ جیت فیڈرر ہی نہیں بلکہ ان کی اہلیہ مرکا کے کیلئے جذباتی ثابت ہوئی۔ ایک موقع پر جب فیڈرر نے پوائنٹ حاصل کیا تو وہ کرسی سے اچھل پڑیں۔ ٹروفی وصول کرتے ہوئے فیڈرر کے ساتھ تماشائیوں میں موجود مرکا کو بھی خوشی سے روتے ہوئے دیکھا گیا۔
