لندن۔6 جولائی(سیاست ڈاٹ کام) ومبلڈن کے دفاعی چمپئن سوئس ٹینس اسٹارراجر فیڈرر جاپانی کمپنی کے ساتھ 230ملین پونڈ کے اسپانسر شپ معاہدے کے نتیجہ میں دنیا کے امیر ترین افراد میں شامل ہو گئے ہیں اور برطانوی جریدے کے مطابق وہ ملکہ برطانیہ سے بھی زیادہ امیر ہو گئے ہیں۔ لندن میں جاری ومبلڈن ٹینس ٹورنمنٹ میں راجر فیڈرر معروف امریکی کمپنی کے بجائے اب اپنی نئی اسپانسر کمپنی کی کٹ میں کھیل رہے ہیں تاہم وہ اب بھی امریکی کمپنی کے ٹینس شوز استعمال کررہے ہیں، جس کے ساتھ انہوں نے اپنا 23سال سے جاری معاہدہ حال ہی میں ختم کیا ہے کیونکہ جاپانی کمپنی ابھی ٹینس شوز نہیں بناتی۔ فیڈرر کے نئے معاہدے کو دنیائے کھیل کا سب سے مہنگا معاہدہ کہا جا رہا ہے۔ دلچسپ بات یہ بھی ہے کہ فیڈرر نے دنیا کو اپنے نئے اسپانسرشپ معاہدے کی خبر ہونے نہیں دی اور جب وہ نئی کٹ میں میچ کھیلنے آئے تو اس کا انکشاف ہوا۔اس معاہدے کے بعد فیڈرر او ران کی سابق اسپانسر کمپنی میں ’’RF8‘‘لوگو پر قانونی جنگ جاری ہے۔ یہ لوگو فیڈرر کے جوتے پر چسپاں ہوتا ہے جو ان کے نام کا محفف اور ومبلڈن کے8 خطابات جیتنے کی نشاندہی کرتا ہے۔سوئس ٹینس اسٹار کے درجنوں دیگر کمپنیوں کے ساتھ بھی معاہدے ہیں اور وہ ان کی بدولت اس وقت کسی بھی کھلاڑی کی نسبت سب سے زیادہ دولت سمیٹ رہے ہیں۔ بتایا گیا ہے کہ وہ انعامات کی صورت میں88ملین پونڈ جیتے ہیں جبکہ انہوں نے اسپانسر شپ معاہدوں سے602ملین پونڈ سمیٹے۔
