لندن۔25 اکٹوبر( سیاست ڈاٹ کام) یورپ کے بڑے فٹبال کلب‘ فٹ بال کی عالمی تنظیم فیفا سے یہ درخواست کرنے پر غور کر رہے ہیں کہ 2022 میں قطر میں ہونے والے فٹبال ورلڈ کپ کا انعقاد مئی کے مہینے میں کیا جائے۔قطر کو 2010 میں2022 میں ہونے والے عالمی کپ کی میزبانی دی گئی تھی لیکن سخت گرم مہینوں میں مقابلوں کی تواریخ بدلنے پر ایک سال سے زیادہ عرصے سے غور کیا جارہا ہے۔یورپین کلب ایسوسی ایشن (ای سی اے) نے، جس میں مانچسٹر یونائیٹڈ، لیورپول، بارسلونا اور بائرن میونخ شامل ہیں‘ مئی 2022 کو اس ایونٹ کے ممکنہ مہینہ تجویز کرنے کے بارے میں بات چیت کی ہے۔ای سی اے سمجھتی ہے کہ خزاں کے موسم میں ٹورنمنٹ میں کم از کم خلل پڑے گا۔قطر کے ٹورنمنٹ منعقد کرنے کے حقوق حاصل کرنے کے فوراً بعد ہی ٹورنمنٹ کے لئے اس ملک کے انتخاب پر سوالات اٹھنا شروع ہو گئے تھے کیونکہ جون اور جولائی کے مہینوں میں جن میں روایتی طور پر یہ ٹورنمنٹ منعقد کیا جاتا ہے‘وہاں انتہائی گرمی ہوتی ہے۔قطر 2022 کے منتظمین ہمیشہ سے یہ کہتے آئے ہیںکہ وہ موسمِ گرما میں یہ ٹورنمنٹ منعقد کرا سکتے ہیں۔
ان کا منصوبہ ہے کہ وہ اسٹیڈیم اور شائقین کے لئے میدانوں میں جدید طرز کی ٹیکنالوجی استعمال کرتے ہوئے ٹھنڈی ہوا پھینکتے رہیں گے تاکہ درجہ حرارت کم رہے۔اس ہفتے ہیرولڈ میئن نکولس نے جنہوں نے 2018 اور 2022 کے ٹورنمنٹس کی بولیوں کی جانچ معائنہکرنے والے فیفا کے ٹیکنیکل کمیشن کی صدارت کی تھی، مشورہ دیا ہے کہ ٹورنمنٹ کو ایک ماہ قبل کرایا جائے اور ہر میچ صبح سویرے شروع کیا جائے۔فیفا نے 40 سے زیادہ درجہ حرارت میں کھیلنے والے کھلاڑیوں کی صحت کے متعلق بڑھتی ہوئی تشویش کے بعد گذشتہ اکتوبر کو مزید صلاح مشورے کے عمل کا اعلان کیا تھا۔فیفا کے صدر سیپ بلاٹر نے اس ہفتے کے آغاز میں کہا ہے کہ ٹورنمنٹ کو نومبر یا دسمبر کے مہینوں میں کرا دیا جائے۔ہم گرمیوں میں ورلڈ کپ نہیں کھیل سکتے۔ کھیل کے لئے سب سے مناسب تاریخ سال کا آخر ہے کیونکہ 2022 کے آغاز میں سرمائی اولمپکس ہوتے ہیں۔بلاٹرنے بین الاقوامی اولمپک کمیٹی کو یقین دلایا کہ ورلڈ کپ اور سرمائی اولمپکس کی تاریخوں میں کوئی ٹکراؤ نہیں ہو گا، جو کہ فروری 2022 میں قازقستان یا چین میں ہونگے۔