لندن۔25 اکٹوبر (سیاست ڈاٹ کام ) اسپاٹ فکسنگ معاملہ میں تحقیقات آگے بڑھانے کیلیے الجزیرہ ٹی وی نے انٹرپول سے رابطہ کرلیا ہے۔ الجزیرہ ٹی وی کی دستاویزی فلم میں کرکٹ کرپشن کو بے نقاب کرتے ہوئے بتایا گیا تھا کہ 15 بین الاقوامی مقابلوں میں 2 درجن کے قریب فکسنگ کے واقعات ہوئے ہیں ان میں7 انگلینڈ،5 آسٹریلیا اور 3 پاکستانی کرکٹرز ملوث ہیں۔ اس اسکینڈل پر کام کرنے والے رپورٹر ڈیوڈ ہیریسن نے ایک انٹرویو میں کہاکہ الجزیرہ ٹی وی انٹرپول کے ساتھ رابطے میں ہے، ہم ادارے کے حکام کو شواہد فراہم کرنا چاہتے ہیں، الزامات کی تفصیلات اور ثبوت انٹرپول کو فراہم کرنا اس لیے بھی ضروری ہے کہ بطور صحافی ہمارے لئے بینک اکاونٹ تک رسائی حاصل کرنا ممکن نہیں،اس ضمن میں ادارہ مدد فراہم کر سکتا ہے۔ انھوں نے ایک مرتبہ پھر اصرار کیا کہ ہمارے پاس فکسنگ کے ناقابل تردید ثبوت موجود ہیں،آئی سی سی اور متعلقہ بورڈز کو کرکٹرز کے نام دے دیے وہ تمام تفصیلات سے آگاہ ہیں۔ فکسرز اور بکیز موجود اور بدعنوانی کے شواہد سامنے ہیں، الزامات ثابت کرنے کیلیے ہر سوال کا جواب موجود ہے۔ دوسری جانب آئی سی سی کے جنرل منیجر اینٹی کرپشن یونٹ الیکس مارشل نے کہاکہ ہماری تحقیقات جاری اور ہم الجزیرہ کی طرف سے مکمل معاونت چاہتے ہیں تاہم ان الزامات میں کوئی صداقت نہیں کہ کونسل کرکٹ میں بدعنوانی کے معاملے کو سنجیدگی سے نہیں لیتی۔
