تہران۔3 مئی (سیاست ڈاٹ کام) ایران میں فٹ بال میچ دیکھنے کے لئے کھیل کی شوقین خواتین نے انوکھی کارروائی کی، تہران کے آزادی اسٹیڈیم میں مصنوعی داڑھی اور وگ لگا کر پہنچ گئیں۔ تہران کے اسٹیڈیم میں مصنوعی داڑھی اور وِگ لگا ئے خواتین، مردوں کا روپ دھار کر فٹ بال میچ دیکھنے آگئیں۔ ایڈونچر کی شوقین لڑکی نے پہلے انٹرنیٹ سے میک اپ اور اسٹیڈیم میں جانے کا راستہ کھوج نکالا، بعد میں سہیلیوں کو بھی اپنے پروگرام میں شامل کیا اور ساری خواتین مل کر اسٹیڈیم جا پہنچیں۔ایران میں خواتین کے کھیلوں کے مقابلے دیکھنے کے لئے اسٹیڈیم جانے پر کوئی سرکاری پابندی نہیں ہے لیکن اکثر اوقات انھیں داخلے کی اجازت نہیں دی جاتی جس کی وجہ سے خواتین کم ہی ایسے مقابلے دیکھ پاتی ہیں۔میچ کے دوران لی گئیں تصاویر اور ویڈیوز سوشل میڈیا پر وائرل ہوگئیں۔ ان خواتین کی اسٹیڈیم میں لی جانے والی تصاویر انگریزی اور فارسی زبان میں استعمال کیے جانے والے سوشل میڈیا پر بڑے پیمانے پر شیئر کی جا رہی ہیں۔
