ہرارے۔3 جولائی (سیاست ڈاٹ کام ) سہ فریقی ٹی ٹوئنٹی سیریز کے تیسرے میچ میں آسٹریلیائی ٹیم نے اپنے کپتان ایرون فنچ کی شاندار سنچری کی بدولت میزبان زمبابوے کو جیت کے لئے 230 رنز کا ہدف دیا ہے تاہم وہ مطلوبہ نشانے کے تعاقب میں 9 وکٹوں کے نقصان سے 129رنز ہی اسکور کرپائی اور آسٹریلیائی ٹیم نے مقابلہ 100 رنز سے اپنے نام کرتے ہوئے رواں سیریز میں متواتر دوسری کامیابی حاصل کرلی۔زمبابوے کے لئے اوپنر مائر نے سب سے زیادہ 19 گیندوں میں 28 رنز اسکور کئے۔قبل ازیں ہرارے اسپورٹس کلب میں کھیلے گئے سیریز کے تیسرے میچ میں میزبان ٹیم کے کپتان ہیملٹن مساکدزا نے مہمان ٹیم کو بیٹنگ کی دعوت دی تاہم ان کا یہ فیصلہ غلط ثابت ہوا۔آسٹریلیائی کپتان ایرون فنچ اور آرکی شارٹ نے اننگز کا آغاز کیا تو شروع سے ہی جارحانہ انداز اپناتے ہوئے گراؤنڈ کے چاروں اطراف دلکش اسٹروکس کھیلے۔آسٹریلیا نے پاور پلے میں 75 رنز جوڑے جس میں کپتان فنچ کی برق رفتار 22 گیندوں پر نصف سنچری بھی شامل تھی۔فنچ اور شارٹ نے میزبان ٹیم کے بولروں پر لاٹھی چارج جاری رکھا اور آخری اوور میں دونوں اوپنرس آوٹ ہوئے لیکن تب تک دونوں نے ٹی ٹوئنٹی تاریخ کی سب سے بڑی 200 رنز کی ریکارڈ اوپننگ پارٹنرشپ قائم کی۔دونوں نے 19.2 اوورس میں 223 رنز بنائے جو کہ ایک عالمی ریکارڈ ہے۔آرکی شارٹ 46 رنز بنا کر وکٹ کے پیچھے کیچ آؤٹ ہوئے جب کہ کپتان ایرون فنچ باہر جاتی ہوئی گیند کو شارٹ مارتے ہوئے وکٹ سے ٹکرا گئے اور بیل گرنے پر انہیں ہیٹ وکٹ آؤٹ دیا گیا۔ زمبابوے کی جانب سے بلیسنگ مزربانی نے دونوں وکٹیں حاصل کیں۔فنچ نے 10 چھکوں اور 16 چوکوں کی مدد سے 76 گیندوں پر 172 رنز بنائے جس کے بعد وہ ٹی ٹوئنٹی طرز کی کرکٹ میں سب سے زیادہ انفرادی رنز بنانے والے دوسرے بیٹسمین بن گئے۔ اس سے قبل ویسٹ انڈیز کے کرس گیل کے نام 175 رنزکا ریکارڈ ہے۔
