یروشلم ، 9 اپریل (سیاست ڈاٹ کام) اسرائیل کی ہائی کورٹ نے ایک فلسطینی اولمپین اتھلیٹ کو غزہ چھوڑ کر غربِ اردن میں میراتھن ریس میں حصہ لینے سے روک دیا ہے۔ اسرائیل نے 2013ء میں بھی فلسطینی اولمپین نادر المصری کو بیت اللحم میں منعقدہ میراتھن ریس میں حصہ لینے سے روک دیا تھا۔ فلسطینی اتھلیٹ نے اسرائیلی حکومت سے بیت اللحم کی میراتھن ریس میں شرکت کی اجازت مانگی تھی لیکن اسے ملٹری کورٹ نے مسترد کر دیا۔ اسرائیلی ہائی کورٹ نے کہا ہے کہ وہ ملٹری کورٹ کے فیصلے میں مداخلت نہیں کر سکتی۔
منگل کو اسرائیلی ہائی کورٹ کے فیصلے کے بعد 34 سالہ نادر المصری کے بیت اللحم میں منعقد شدنی ریس میں شرکت کے تمام امکانات ختم ہوگئے ہیں۔ نادر المصری نے 2008 میں اولمپکس میں حصہ لیا تھا۔ انھوں نے عدالتی فیصلے پر مایوسی کا اظہار کرتے ہوئے کہا کہ انھیں امید تھی کہ وہ غزہ سے باہر ہونے والے مقابلوں میں شرکت کر سکیں گے لیکن اب ایسا ممکن نہیں ہے۔ اسرائیل نے فلسطینی شہریوں کے غزہ سے باہر جانے کی پابندی عائد کر رکھی ہے اور اکا دکا لوگوں کو ہی غزہ سے باہر جانے کی اجازت دی جاتی ہے۔