کابل،3دسمبر(سیاست ڈاٹ کام) افغانستان میں امریکی فضائی حملہ کے نتیجے میں طالبان کے سینئر کمانڈر ملا عبدالمنان اخوند ہلاک ہو گئے ۔غیر ملکی خبر ایجنسی کے مطابق ہفتہ اور اتوار کی درمیانی رات افغان صوبے ہلمند کے ضلع نوزاد میں امریکی طیاروں نے افغان طالبان کے مشتبہ ٹھکانے پر حملہ کیا۔ جس میں 29 طالبان ہلاک اور کئی زخمی ہوئے ۔ ہلاک ہونے والوں میں طالبان کی جانب سے ہلمند کے لئے مقرر کئے گئے گورنر اور عسکری سربراہ ملا عبدالمنان اخوند بھی شامل ہیں۔افغان طالبان نے ملاعبدالمنان کی موت کی تصدیق کرتے ہوئے کہا ہے کہ وہ افغانستان سے غیر ملکی افواج کے انخلا تک اپنی جدو جہد جاری رکھیں گے ۔دوسری جانب افغان وزارت خارجہ کے ترجمان نجیب دانش نے کہا ہے کہ ملا عبدالمنان کی موت طالبان کے لیے بہت بڑا دھچکا ہے ۔واضح رہے کہ صوبہ ہلمند کو افغان طالبان کے سب سے بڑے گڑھ کے طور پر جانا جاتا ہے ۔ 2014 میں برطانوی فوج کے انخلا کے بعد سے صوبہ کے بیشتر حصے پر افغان طالبان کا تسلط ہے ۔
