پیرس ، 7 جون (سیاست ڈاٹ کام) فرانسیسی کھلاڑی فرینک ربیری زخمی ہونے کے باعث برازیل میں ہونے والے فیفا ورلڈ کپ سے باہر ہوگئے ہیں۔ ربیری کو جمعہ کی شام اس وقت اسپتال لے جایا گیا جب انھوں نے پریکٹس سیشن کے دوران کمر کے نچلے حصے میں تکلیف کی شکایت کی۔ ڈاکٹروں نے ان کے ٹسٹ کرنے کے بعد بتایا کہ انجری زیادہ ہے اور وہ برازیل میں اس ماہ منعقد ہونے والے ورلڈ کپ میں شرکت نہیں کر پائیں گے۔ فرانسیسی کوچ ڈی شیمپس کا کہنا ہے کہ 31 سالہ ربیری کی انجری زیادہ ہے اور وہ میچ تو کیا پریکٹس میں بھی شریک نہیں ہوسکتے۔ ڈی شیمپس کے مطابق پریکٹس کے دوران ان کا درد اتنا زیادہ ہو گیا کہ تربیتی سیشن کو روکنا پڑا۔
واضح رہے جرمن کلب بائرن میونخ کی جانب سے کھیلنے والے ربیری کوگزشتہ کچھ ہفتوں سے اس تکلیف کا سامنا تھا فرانس کی طرف سے 81 میچوں میں 16گول کرنے والے ربیری کا فرانس کے ورلڈ کپ کوالیفائنگ راؤنڈ میں اہم کردار رہا جس میں انھوں نے پانچ گول کئے۔ ربیری کو فیفا کی طرف سے گزشتہ سال تیسرے بڑے کھلاڑی ہونے کا اعزاز بھی حاصل ہوا۔ انھوں نے اپنے کلب بائرن میونخ کا جرمن لیگ کپ جیتنے میں بھی اہم کردار ادا کیا۔ تین بار سال کے بہترین فرانسیسی کھلاڑی کا اعزاز پانے والے ربیری زخمی ہو کر ورلڈ کپ سے باہر ہونے والے دوسرے فرانسیسی کھلاڑی ہیں۔ فرانسیسی مڈ فیلڈر کلیمنٹ گرینئیر بھی زخمی ہونے کی وجہ سے ورلڈ کپ سے باہر ہوچکے ہیں۔