کراچی ۔13 اگسٹ (سیاست ڈاٹ کام) پاکستانی کرکٹ ٹیم کے اسٹار اوپنر فخر زمان نے ایشیاکپ میں ہندوستان کیخلاف میچ میں سنچری بنانے کا عزم ظاہرکیا۔ انٹرویو میں انہوں نے کہا کہ روایتی حریف کے خلاف چیمپئنز ٹرافی کے فائنل میں جیسی کارکردگی دکھائی تھی کوشش ہوگی کہ ویسامظاہرہ ایشیا کپ میں بھی پیش کریں۔ ایک سوال پر انہوں نے کہا کہ وہ ہندوستان کے علاوہ دیگر میچوں میں بھی اچھی کارکردگی دکھانے پر توجہ مرکوز کرچکے ہیں۔ فخر زمان نے کہا کہ ان دنوں وہ صرف میگا ایونٹ کی تیار ی کر رہے ہیں اور امید ہے کہ ٹورنمنٹ میں وہ ٹیم کو کامیابی دلانے میں اہم کردار ادا کریں گے۔ وہ انفرادی نشانہ مقرر کرنے پر یقین نہیں رکھتے اور ہر میچ اور سیریز کے حساب سے اچھی کارکردگی کیلئے کوشاںرہتے ہیں۔ فخر زمان کے مطابق ان کی کامیابی کی وجہ یہی ہے کہ وہ ٹیم ورک پر یقین رکھتے ہیں۔ پاکستان سوپر لیگ کے حوالے سے سوال پر انہوں نے کہا کہ اس ایونٹ سے بہت کچھ سیکھنے کو ملا اور ان میں کافی اعتماد بھی آیا۔ انہوں نے کہا کہ لاہور قلندرز کی جانب سے کھیلتے ہوئے سینئر کرکٹرز کے ساتھ ڈریسنگ روم میں تبادلہ خیال کا موقع ملا اور ان سمیت حسن علی، شاداب خان، فہیم اشرف پی ایس ایل سے سامنے آئے۔ لاہور قلندرزکا ڈویلپمنٹ پروگرام پاکستان کے دور دراز علاقوں میں رہنے والے نوجوانوں کیلئے بہترین ہے اور وہ خود کو اس پلیٹ فارم سے دنیا کے سامنے لائیں۔ مذکورہ علاقوں میں باصلاحیت کھلاڑی موجود ہے لیکن سہولتیں نہ ہونے کی وجہ سے وہ ضائع ہورہے ہیں۔
