ابوظہبی ۔ 17اکٹوبر(سیاست ڈاٹ کام ) پاکستان کی آسٹریلیا کے خلاف ابوظہبی ٹسٹ کے دوران جب بیٹنگ لائن لڑکھڑائی تو فخر زمان مردِ بحران ثابت ہوئے اور ٹیم کو مشکل حالات سے نکالا، لیکن اپنی سنچری بنانے سے قبل خود ہی لڑکھڑا گئے۔ نیتھن لیون جب 6 گیندوں میں 4 بیٹسمینوں کو آوٹ کرچکے تھے تب آسٹریلیائی کپتان ٹم پین کی خوشی بتارہی تھی کہ پہلا ٹسٹ کھیلنے والے فخر زمان بھی وکٹ پر زیادہ دیر نہیں رک پائیں گے لیکن انہوں نے حریف ٹیم کی تمام امیدوں پر پانی پھیر دیا۔نسبتاً بہتر وکٹ پر جب بیٹنگ لائن لڑکھڑائی تو فخر زمان نے کپتان سرفراز احمد کے ساتھ مل کر 147 رنز جوڑے۔ٹیم کو سنبھالنے کے بعد فخر زمان اپنے آپ کو نہیں سنبھال پائے اور نروس نائنٹیز کا شکار ہر کر مارنس لبوشین کی گیند پر 94 رنز بنانے کے بعد ایل بی ڈبلیو آؤٹ ہوگئے۔ آؤٹ ہونے کے ساتھ ہی فخر زمان اپنے پہلے ٹسٹ کی پہلی اننگز میں سنچری سے چند رن قبل آؤٹ ہونے والے پاکستان کے چوتھے بدقسمت بیٹسمین بن گئے۔ان سے قبل عاصم کمال 2003 میں جنوبی افریقہ کے خلاف اپنے پہلے مقابلے میں 99 رنز بنانے کے بعد آؤٹ ہوگئے تھے۔ پاکستان کے 90 اور 100 رنز کے درمیان آؤٹ ہونے والے پہلے بدقسمت کھلاڑی عبدالقادر تھے جو اکتوبر 1964 میں آسٹریلیا کے ہی خلاف اپنے پہلے مقابلے میں 95 رنز بنانے کے بعد آؤٹ ہوئے تھے۔ان کے علاوہ چوتھے بیٹسمین تسلیم عارف تھے جو جنوری 1980 میں روایتی حریف ہندوستان کے خلاف 90 رنز بنائے ۔ایف ایس جیکسن سب سے پہلے 1893 میں آسٹریلیا کیخلاف 91 رنز آؤٹ ہوئے تھے۔
