غزہ ۔ 26 جون (سیاست ڈاٹ کام) گذشتہ روز فلسطینی علاقے غزہ پٹی سے تعلق رکھنے والے 43 فلسطینی شہریوں نے مقبوضہ مغربی کنارے میں قائم اسرائیل کی نفحہ جیل میں قید اپنے عزیزوں سے ملاقات کی۔ فلسطینی میڈیا رپورٹس کے مطابق فلسطینی اسیران اور ان کے اقارب کے درمیان ملاقات کا اہتمام انسانی حقوق کیلئے کام کرنے والے ادارے ریڈکراس کی جانب سے کیا گیا تھا۔ ریڈرکراس کی ترجمان سھیر زقوت نے بتایا کہ غزہ پٹی کے 43 شہریوں جن میں 15 بچے شامل تھے، جس نے اسرائیلی نفحہ جیل میں قید 23 اسیران سے ملاقات کی۔ ملاقات کیلئے غزہ کے شہری سرحدی گذرگاہ بیت حانوں سے بسوں کے ذریعہ راستے پہنچے تھے۔ خیال رہیکہ اسرائیلی جیلوں میں پابند سلاسل فلسطینیوں کی تعداد 6500 سے زائد ہے۔ ان میں سینکڑوں فلسطینی غزہ کی پٹی سے تعلق رکھتے ہیں۔ اسیران میں 62 خواتین اور 35 بچے ہیں جن کی عمریں 18 سال سے کم بتائی جاتی ہیں۔
