لاہور ۔ 8 مئی (سیاست ڈاٹ کام) پاکستانی بلے باز عمر اکمل اپنی بیٹنگ کی وجہ سے تو کم ہی شہ سرخیوں میں رہتے ہیں لیکن تنازعات کے سبب خبروں کی زینت بننے کا فن بخوبی جانتے ہیں اور اب انہوں نے سابق کوچ وقار یونس پر الزامات لگا کر نیا پنڈورا باکس کھول دیا ہے۔ پاکستان کپ میں خیبر پختونخوا کی نمائندگی کرنے والے عمر اکمل قومی ٹیم میں جگہ بنانے کے خواہشمند ہیں لیکن ڈومیسٹک سطح پر مستقل ناکامی سے دوچار ہوئے جس کا اندازہ اس بات سے لگایا جا سکتا ہے کہ حالیہ پاکستان کپ کے 5 میچوں میں انہوں نے صرف 72 رنز بنائے۔ فائنل میں خیبرپختونخوا کی ٹیم مشکلات سے دوچار تھی اور انہیں عمر اکمل کی جانب سے ایک اچھی اننگز کی اشد ضرورت تھی لیکن مڈل آرڈر بلے باز صرف ایک رن بنا کر پویلین لوٹ گئے۔ خراب کارکردگی کے باوجود عمر اکمل کی شعلہ بیانی کا سلسلہ ختم نہیں ہو رہا اور ایونٹ کے فائنل کے دوران گفتگو کرتے ہوئے انہوں نے سابق کوچ وقار یونس پر الزامات عائد کیے۔ انہوں نے کہا کہ مجھے ٹسٹ میچوں میں وکٹ کیپنگ کرنے کا کہا گیا لیکن میں نے اس سے انکار کردیا حالانکہ میں گزشتہ 3 سے 4 سال سے محدود اوورز کی کرکٹ میں وکٹ کیپنگ کی ذمے داریاں انجام دے رہا تھا۔ انہوں نے کہا کہ اس وقت کے کوچ وقار یونس نے مجھ سے ٹسٹ میچوں میں وکٹ کیپنگ کیلئے کہا لیکن میں نے انکار کردیا کیونکہ آگے دبئی میں سیریز تھی جہاں مصباح الحق 3 اسپنرز اور ایک فاسٹ باؤلر کھلاتے تھے۔ عمر اکمل نے کہا کہ میرا ماننا تھا کہ ان کنڈیشنز میں وکٹ کیپنگ کرنے سے میری بلے سے کارکردگی متاثر ہو سکتی تھی لیکن وقار یونس کو میری بات بری لگ گئی۔ انہوں نے کہا کہ مجھے آج بھی وقار یونس کے الفاظ یاد ہیں۔
