کراچی۔30 جولائی(سیاست ڈاٹ کام) سابق کپتان عمران خان کی سیاسی جماعت کی عام انتخابات میں کامیابی کے بعد ان سے ملک میں کھیلوں کی تباہی پر نوٹس لینے کا مطالبہ کیا گیا۔ باکسنگ ٹیکنیکل آفیشل علی اکبر شاہ قادری، اولمپک ریفری جج غلام حسین پٹنی، اولمپیئن عبدالرشید قمبرانی، مہر اآ لاسی، محمد ساجد راجہ، علی محمد نے مشترکہ بیان میں کہا کہ گزشتہ 10 برس میں کسی بھی حکومت نے ملک کے حقیقی سفیر کھلاڑیوں پر کوئی توجہ نہیں دی اور نہ ایسی پالیسی بنائی گئی جس سے اسپورٹس فیڈریشنز، صوبائی اسوسی ایشنز کا ناقص کارکردگی پر احتساب ہوتا۔انہوں نے کہا کہ چاروں صوبوں اور وفاق میں کھیلوں کو کنٹرول کرنے والے اداروں میں کرپشن اور پرسنٹیج مافیا کا کنٹرول ہے۔ ڈپارٹمنٹل ٹیموں کی بندش سے کھلاڑی معاشی مسائل کا شکار ہوگئے۔ جن کھیلوں میں 10 سال تک عالمی سطح پر پاکستان کا نام روشن اور پرچم بلند ہوا، غلط منصوبہ بندی کے ذریعے انہیں تباہ کر دیا گیا۔ اس وقت صورتحال یہ ہے کہ کھیل اور کھلاڑیوں کو پوچھا نہیں جا رہا لیکن امید ہے کہ عمران خان اور ان کی منتخب کابینہ ملک میں کھیلوں کے فروغ کے اہم ترین مسئلے پر بھرپور توجہ دے گی۔
