قاہرہ۔ 9 ڈسمبر۔(سیاست ڈاٹ کام) عرب ممالک کی مشترکہ پارلیمنٹ کی قیادت ایک بار پھر سعودی عرب کو سونپ دی گئی ہے۔العربیہ کے مطابق عرب پارلیمنٹ کے اسپیکر کے چنائو کیلئے پارلیمنٹ میںموجودہ اسپیکر اور سعودی سے تعلق رکھنے والے سیاسی رہنما ڈاکٹر مشعل بن فھم السلمی نے پارلیمنٹ کے اسپیکر کے چنائو میں حصہ لیا۔ انہیں دوسری بار عرب پارلیمنٹ کا اسپیکر منتخب کرلیا گیا ہے۔عرب پارلیمنٹ کے اسپیکر کے چنائو کیلئے خصوصی اجلاس گذشتہ روز قاہرہ میں منعقد ہوا۔ اجلاس میں عرب پارلیمنٹ میں سعودی عرب کے مثبت کردار کو سرہا گیا اور ایک بار پھر یہ ذمہ داری سعودی عرب کو سونپی گئی۔اسپیکر منتخب ہونے کے بعد ڈاکٹر السلمی نے خادم الحرمین الشریفین شاہ سلمان بن عبدالعزیز، ولی عہد محمد بن سلمان اور وزیر خارجہ عادل الجبیر کا اس منصب کی حمایت پر خصوصی شکریہ ادا کیا۔ عرب پارلیمنٹ کے ارکان نے بھی ڈاکٹر السلمی کو قاید ایوان مقرر ہونے پر مبارکباد پیش کی اورفورم سے قضیہ فلسطین کی نصرت، سوڈان پرعاید پابندیاں ختم کرانے، دہشت گردی کے خلاف جنگ میں عرب ممالک کے ساتھ تعاون اور عرب ممالک کے اندرونی معاملات میںمداخلت کی روک تھام کے حوالے سے سعودی عرب کی خدمات کو سراہا۔
