بغداد ۔ 13 جون (سیاست ڈاٹ کام) عراق میں ایک عسکری گروپ کی جانب سے پرتشدد کارروائیوں کو شیعہ ۔ سنی رنگ دینے کی سازش کے تحت معرب کے میڈیا نے عراق کے واقعات اور خبروں کو دو فرقوں کے درمیان تصادم کے تناظر میں عام کرنا شروع کیا ہے جبکہ عسکریت پسند یا دہشت گردوں کا کوئی فرقہ یا مذہب نہیں ہوتا۔ عراق میں رونما ہونے والے واقعات مغرب طاقتوں کی ایک نئی شرانگیز کوشش کا حصہ ہیں۔ عراق کے بڑے شہروں موصل، فلوجہ، تکریت پر عسکریت پسندوں کے قبضوں کی خبروں کو سنی اکثریتی والے علاقہ اور شیعہ اکثریتی والے شہروں کی اصطلاح میں پیش کیا جاکر غلط فہمیاں پیدا کی جارہی ہیں جبکہ عراق میں شیعہ اور سنیوں کے درمیان کوئی تصادم نہیں ہے۔ نوری المالکی زیرقیادت حکومت کو بھی شیعہ زیرقیادت حکومت کے حوالے سے مغربی میڈیا کی خبروں نے بے چینی پیدا کردی ہے جبکہ عراق میں تازہ رونما ہونے والی صورتحال دو فرقوں کے درمیان تصادم کو ہوا دینے کی کوشش اور سازش ہوسکتی ہے۔
