سنچورین ۔24 ڈسمبر (سیاست ڈاٹ کام ) پاکستان کرکٹ ٹیم دورہ جنوبی افریقہ پر فٹنس مسائل کا شکار ہے اور میزبان ٹیم کیخلاف پہلے ٹسٹ میچ میں فاسٹ بولر محمد عباس ممکنہ طور پر پہلے میچ سے باہر ہو گئے ہیں۔ پاکستان اور جنوبی افریقہ کے درمیان پہلا ٹسٹ میچ 26دسمبر کو سنچورین میں کھیلا جائے گا لیکن سیریز کے پہلے میچ سے قبل ہی پاکستانی ٹیم مسائل کا شکار ہو گئی ہے۔ذرائع کے مطابق پاکستان فاسٹ بولنگ کے اہم ستون محمد عباس کندھے کی تکلیف سے چھٹکارا حاصل نہ کرسکے جس کے باعث پہلے ٹسٹ میچ میں ان کی شرکت نہیں ہورہی ہے اور وہ پہلا ٹسٹ میچ نہیں کھیل سکیں گے۔سنچورین ٹسٹ میں عباس کی عدم شرکت پاکستان کے لئے کسی بڑے دھکے سے کم نہیں کیونکہ فاسٹ بولر پاکستان کی فتح میں مرکزی کردار ادا کرتے رہے ہیں اور جنوبی افریقہ کی وکٹوں پر وہ بہت سازگار ثابت ہو سکتے تھے۔ ذرائع کے مطابق عباس کے زخم سے صحتیاب نہ ہونے کے سبب پہلے ٹسٹ میچ کے لیے پاکستانی بولنگ محمد عامر، شاہین شاہ آفریدی اور حسن علی پر انحصار کرے گی جبکہ لیگ اسپنر یاسر شاہ اسپن ذمہ داری سنبھالیں گے۔ بیٹنگ شعبہ میں محمد حفیظ کی سبکدوشی کے بعد امام الحق کے ساتھ فخرزمان اننگز کا آغاز کریں گے۔ مڈل آرڈر کی ذمے داری حارث سہیل، اظہرعلی، اسد شفیق اور بابر اعظم پر ہو گی۔دوسری جانب چیئرمین پی سی بی احسان مانی بھی ٹسٹ سیریز کے دوران جنوبی افریقہ کا دورہ کریں گے۔احسان مانی سنچورین میں پہلا ٹسٹ دیکھنے کے ساتھ جنوبی افریقہ کی ٹیم کو دورہ پاکستان کی دعوت بھی دیں گے۔
