ابوظہبی ۔7 ڈسمبر (سیاست ڈاٹ کام ) پاکستان کے وزیراعظم عمران خان نے اپنی ٹیم کے لیگ اسپنر یاسر شاہ کو 33 میچوں میں 200 وکٹیں لے کر 82 سالہ ریکارڈ توڑنے پر مبارکباد دی۔ سماجی رابطے کی ویب سائٹ ٹوئٹر پر کیے گئے ٹوئٹ میں وزیراعظم نے یاسر شاہ کو مبارک باد دی اور لکھا کہ ’ یاسر شاہ نے آسٹریلیائی بولر کا ریکارڈ توڑ کر صرف 33 میچوں میں تیز ترین 200 ٹسٹ وکٹوں کا سنگ میل عبور کرنے والے بولر کا اعزاز حاصل کرلیا۔ وزیراعظم نے یاسر شاہ کی کارکردگی کو سراہتے ہوئے مزید لکھا کہ گزشتہ ہفتے انہوں نے ٹسٹ میچ میں 14 وکٹیں لے کر میرا ریکارڈ بھی برابر کیا تھا۔خیال رہے کہ یاسر شاہ نے نیوزی لینڈ کے خلاف ٹسٹ سیریز کے تیسرے میچ کی دوسری اننگز میں کیوی بیٹسمین ولیم سمر ویلے کو ایل بی ڈبلیو آؤٹ کرکے یہ سنگِ میل عبور کیا تھا۔ یاسر شاہ نے نیوزی لینڈ کے خلاف ٹسٹ میچ میں آسٹریلیا کے لیجنڈری لیگ اسپینر کلیری گریمیٹ کا ریکارڈ توڑا ہے،کلیری گریمیٹ نے 82 سال قبل 1936 میں تیز ترین 200 وکٹیں لینے کا ریکارڈ اپنے نام کیا تھا۔ واضح رہے کہ یاسر شاہ نے نیوزی لینڈ کے خلاف سیریز کے دوسرے ٹسٹ میچ میں 14وکٹیں لے کر سابق کپتان اور موجودہ وزیر اعظم پاکستان عمران خان کا 36 سالہ قدیم ریکارڈ بھی برابر کیا۔ سابق کپتان اور موجودہ وزیراعظم عمران خان نے 1982 میں سری لنکا کے خلاف میچ میں 116رنز کے عوض 14وکٹیں لی تھیں۔
