کراچی ، 7 اپریل (سیاست ڈاٹ کام) پاکستان کرکٹ ٹیم کے مڈل آرڈر بیٹسمن صہیب مقصود کلائی میں فریکچر کے سبب دورۂ بنگلہ دیش سے باہر ہوگئے ہیں۔ وہ ونڈے اور ٹی ٹوئنٹی ٹیم کا حصہ تھے۔ سلیکشن کمیٹی نے ان کی جگہ سعد نسیم کو ونڈے اسکواڈ میں شامل کرنے کا فیصلہ کیا ہے جو پہلے ہی ٹی ٹوئنٹی ٹیم میں شامل ہیں۔ مقصود نے منگل کو پاکستانی کرکٹ ٹیم کے تربیتی کیمپ کے پہلے ہی دن کلائی میں تکلیف کی شکایت کی جس پر فریکچر کا پتہ چلا۔ واضح رہے کہ مقصود کی یہ تکلیف ورلڈ کپ سے پہلے کی تھی۔ تاہم وہ فٹ قرار دیے جانے کے بعد ورلڈ کپ کی ٹیم میں شامل کیے گئے تھے۔ ورلڈ کپ میں مقصود کی کارکردگی مایوس کن رہی تھی اور وہ چھ اننگز میں صرف 153 رنز بناسکے تھے جس میں صرف ویسٹ انڈیز کے خلاف ایک نصف سنچری شامل تھی۔ سعد نسیم گزشتہ سال آسٹریلیا اور نیوزی لینڈ کے خلاف تین ٹی ٹوئنٹی میچ کھیلے تھے۔ پاکستانی کرکٹ ٹیم کا تربیتی کیمپ 11 اپریل تک جاری رہے گا، جس کے بعد پاکستانی ٹیم 13 اپریل کو ڈھاکہ پہنچے گی۔
