لیورپول۔13 ڈسمبر(سیاست ڈاٹ کام ) مصر کی فٹبال ٹیم کے کپتان محمد صلاح نے ایک مرتبہ پھر انگلش کلب لیور پول کو اہم فتح دلادی اور چمپیئنز لیگ کے میچ میں اطالوی کلب نپولی کے خلاف صلاح کے فیصلہ کن نے لیور پول کو لیگ کے ناک آوٹ مرحلے میں پہنچا دیا ہے، دوسری جانب اسی گروپ سے فرانسیسی کلب پیرس سینٹ جرمین بھی سربیا کے کلب کو 1-4 سے شکست دے کر اگلے مرحلے تک رسائی میں کامیاب رہا۔ لیور پول اور نپولی کا میچ انگلش کلب کے ہوم گراونڈ پر کھیلا گیا تاہم سخت مقابلے کے باوجود صرف ایک گول ہی ہو سکا یہ گول میچ کے34منٹ میں محمد صلاح نے انفرادی کوشش سے کیا اور ٹیم کو وہ برتری دلائی جو میچ کے آخر تک قائم رہی۔ لیور پول کو لیگ کے ناک آوٹ راونڈ میں پہنچنے کے لئے 0-1 یا 2گول سے فتح کی ضرورت تھی جو صلاح نے پوری کردی۔ صلاح کو ایک اورگول کرنے کا موقع بھی ملا تھا لیکن نپولی کے گول کیپر نے عمدہ کھیل کو مظاہرہ کرتے ہوئے یہ کوشش ناکام بنا دی۔ اطالوی کلب کی جانب سے زیادہ اچھا کھیل پیش نہیں کیا گیا تاہم لیور پول کے کھلاڑی مواقع سے فائدہ نہیں اٹھا سکے جس کی وجہ سے اسکور میں اضافہ نہیں ہو سکا اور اطالوی کلب کسی دباو کے بغیر میچ برابر کرنے کی کوشش میں مصروف رہا۔ میچ کے آخری منٹوں میں نپولی کو ایک سنہری موقع ملا لیکن اس مرتبہ لیور پول کے گول کیپر نے بہت عمدگی سے اسے ناکام بنا دیا۔ دوسری جانب نیمر جونیئر کی ٹیم پیرس سینٹ جرمین نے سرب کلب ریڈ اسٹارز بلغراد کو یکطرفہ مقابلے کے بعد1-4 سے ہرا دیا۔ پی ایس جی کی جانب سے کیوانی، نیمر ، مباپے اور مارکنہوس نے گول کئے جبکہ ریڈ اسٹارز کا واحد گول گوبلجچ نے اسکور کیا۔ لیور پول اورنپولی دونوں سربیا کے کلب کو اس کے ہوم گراونڈ پر شکست دینے میں ناکام رہے تاہم فرانسیسی کلب نے بڑی کا میابی کے ذریعے گروپ سی کی ٹاپ ٹیم کے حیثیت سے ناک آوٹ راونڈ کوالیفائی کر لیا۔
