لندن۔6 جون (سیاست ڈاٹ کام) لیورپول کی میڈیکل ٹیم نے کہا ہے کہ ان کے پاس محمد صلاح کو مکمل طور پر فٹ کرنے کے لیے وقت بہت کم ہے۔روس میں فیفا ورلڈ کپ میں شرکت کے لئے دنیا بھر سے 32 ٹیمیںجمع ہیں اورکلب فٹبال میچوں کے مداحوں کے لیے انٹرنیشنل فٹبال مقابلوں میں ا پنے پسندیدہ کھلاڑیوں کو اپنی اپنی ٹیم کی طرف سے کھیلتے دیکھنا ایک مختلف اور معمول سے ہٹ کر تجربہ ہوتا ہے۔ میسی جیسا بڑا کھلاڑی بائیسویں نمبر کی آئس لینڈ کی ٹیم کے خلاف کیا کرے گا یا پھر ایران جیسی اوسط ٹیم رونالڈو کو گول کرنے سے روکنے کے لیے کیا کرے گی۔ یہ ایسے لمحات ہیں جن کا مداحوں کو انتظار رہتا ہے۔ رئیل میڈرڈ کو چیمپیئنز لیگ کے فائنل میں فتح دلوانے میں کریم بینزیما کا مرکزی کردار تھا تاہم فرانسیسی کوچ ڈیڈیئر ڈسچامپس نے کریم بینزیما کو 2015 ء کے بعد سے فرانس کی ٹیم کا حصہ نہیں بننے دیا اور بینزیما یہ بات متعدد بار کہہ چکے ہیں کہ جب تک ڈیڈیئر ڈسچامپس کوچ ہیں ان کے خیال میں وہ ان کا انتخاب نہیں کریں گے۔اسی طرح برطانوی کلب مانچسٹر سٹی کی طرف سے کھیلنے والے ا سٹار جرمن کھلاڑی لیرواے سانے اور چیلسی کی طرف سے کھیلنے والے ہسپانوی اسٹرائیکر ایلورو موراٹا بھی اپنی اپنی ٹیم کے کوچز کو مطمئن کرنے میں ناکام رہے۔ جب کھلاڑی مکمل فٹ ہو اور ورلڈ کپ کی تیاری کررہا ہو اور اچانک زخمی ہوجائے ایسا کچھ لیورپول کے اسٹار اسٹرائیکر اور مصری کھلاڑی محمد صلاح کے ساتھ ہوا۔ لیورپول کی میڈیکل ٹیم نے کہا ہے کہ ان کے پاس صلاح کو مکمل طور پر فٹ کرنے کے لیے وقت بہت کم ہے اور شاید صلاح پہلا میچ نہ کھیل پائیں۔ اگر ایسا ہوتا ہے تو مصر کے لیے مشکلات میں اضافہ ہوجائے گا کیونکہ مصر کا پہلا میچ یوراگوئے کے خلاف ہے۔اسی طرح فرانسیسی کلب پی ایس جی کی طرف سے کھیلنے والے نیمر ڈی سلوا بھی پوری طرح فٹ نہیں۔ برازیل کی ٹیم ویسے تو فٹبال ا سٹارز سے بھری پڑی ہے لیکن نیمر جونیئر سے زیادہ تیز، پھرتیلا ا سٹرائیکر اس وقت ان کے پاس نہیں۔
