حیدرآباد۔/29 ڈسمبر، ( سیاست نیوز) جبراً وصولی ، لوٹ مار ، اراضیات پر ناجائز قبضہ ، تاوان کا مطالبہ ، اغوا جیسے سنگین جرائم کا ارتکاب کرنے والی ٹولی کیا پھر سرگرم ہوگئی ہے ایسے واقعات میں ملوث بد نام زمانہ گینگسٹر نعیم عرف بھونگیر نعیم کی ٹولی کی سرگرمیاں کیا پھر شروع ہوچکی ہیں۔ اس بات سے خود پولیس بھی انکار نہیں کرتی ۔ خطرناک گینگسٹر کی انکاونٹر میں ہلاکت کے بعد اب اس ٹولی کے اثرات سماج پر بھی دکھائی دے رہے ہیں۔ گزشتہ چند عرصہ سے نعیم کے بااثر اراکین سمجھے جانے والے شیشنا اور ایلم گوڑ کی سرگرمیوں کو سائبرآباد حدود میں دیکھا گیا اور ان کی سرگرمیوں میں دن بہ دن اضافہ ہوتا جارہا ہے۔ اس بات کی توثیق کرتے ہوئے سائبر آباد کمشنر مسٹر وی سی سجنار نے بتایا کہ پولیس نے ایسی سرگرمیوں کو محسوس کیا ہے تاہم شکایت کی عدم وصولی کے باوجود بھی ایسی سماج و عوام دشمن سرگرمیوں کو برداشت نہیں کیا جائے گا۔ انہوں نے کہا کہ سائبر آباد پولیس ایسی کسی قسم کی سرگرمی سے سختی سے نمٹے گی اور ایسی سرگرمیوں کو جڑ سے اُکھاڑ پھینک دیا جائے گا۔
