نئی دہلی، 3اپریل (سیاست ڈاٹ کام) کانگریس نے منگل کو بھارتیہ جنتا پارٹی (بی جے پی) کے قومی صدر امت شاہ کے خلاف گاندھی نگر لوک سبھا سیٹ سے گجرات کانگریس کے سابق صدر سی جے چاؤڑا کو اپنا امیدوار قرار دیا ہے ۔ مسٹر چاؤڑا گاندھی نگر (شمال) سیٹ سے کانگریس کے ممبر اسمبلی ہیں۔ کانگریس نے سابق مرکزی وزیر سبودھ کانت سہائے کو رانچی سے جبکہ سابق مرکزی وزیر پرنیت کور کو پٹیالہ اور پون کے بنسل کو چندی گڑھ سے پارٹی کا امیدوار بنایا ہے ۔ کانگریس نے منگل کو لوک سبھا انتخابات کے لئے 20 امیدواروں کی فہرست جاری کی ہے ۔ کانگریس کے جنرل سکریٹری مکل واسنک نے امیدواروں کی فہرست جاری کی۔ اس فہرست میں گجرات اور ہماچل پردیش سے ایک ایک، جھارکھنڈ سے تین، کرناٹک سے دو، اڑیسہ سے دو، پنجاب سے چھ، مرکز کے زیر انتظام ریاستوں چندی گڑھ سے ایک اور دادرا ناگر حویلی سے ایک امیدوار وں کے ناموں کا اعلان کیا ہے ۔ کانگریس کی اس فہرست میں پنجاب کے ضلع گروداس پور سے سنیل جاکھڑ جبکہ امرتسر سے گرجیت سنگھ اوجلا اور لدھیانہ سے رونیت سنگھ بٹو کے نام شامل ہیں۔
