دبئی۔12 نومبر (سیاست ڈاٹ کام ) پاکستان کرکٹ بورڈ کی سلیکشن کمیٹی نے انضمام الحق کی سرپرستی میں نیوزی لینڈ کے خلاف 3 ٹسٹ میچوں کی سیریز کے ابتدائی 2 میچوں کیلئے15رکنی پاکستانی اسکواڈ کا اعلان کرتے ہوئے پہلی مرتبہ نوجوان فاسٹ بولر شاہین آفریدی اور بیٹسمین سعد علی کو بھی شامل کر لیا ہے جو پہلی مرتبہ ٹسٹ کرکٹ میں پاکستان کی نمائندگی کر سکیں گے۔ دونوں ٹیموں کے درمیان ٹسٹ سیریز کا آغاز 16 نومبر سے ہوگا۔ انضمام الحق نے کپتان سرفراز احمد اور ہیڈ کوچ مکی آرتھر سے مشورے کے بعد اسکواڈ کیلئے کھلاڑیوں کا انتخاب کیا۔ چیف سلیکٹر کے مطابق اسکواڈ کا انتخاب امارات کے موسم اور ماحول کے علاوہ وکٹوں کی صورتحال کو مد نظر رکھ کر کیا گیا ہے۔ انہوں نے کہا کہ ابوظہبی اور دبئی میں ہونے والے ابتدائی2 ٹسٹ میچوں کیلئے اعلان کردہ 15 رکنی اسکواڈ میں فخرزمان اور شاداب خان جگہ بنانے میں کامیاب نہیں ہوئے ہیں اور ان دونوں کو سلیکشن کمیٹی نے نیشنل کرکٹ اکیڈمی (این سی اے) میں ٹریننگ کی ہدایت دی ہے۔ اسی طرح فاسٹ بولر وہاب ریاض بھی ٹسٹ اسکواڈ میں جگہ نہیں بنا سکے ہیں جبکہ شاہین آفریدی کو ٹی 20 اور ونڈے سیریز میں شاندار بولنگ کی بنا پر وہاب ریاض کی جگہ اسکواڈ کا حصہ بنایا ہے۔ ایک اور نوجوان بولر میر حمزہ بھی اسکواڈ میں جگہ برقرار رکھنے میں کامیاب رہے ہیں۔سعد علی کو ڈومیسٹک کرکٹ اور پاکستان اے کے ساتھ امارات کی حالیہ سیریز میں شاندار کارکردگی پر ٹسٹ اسکواڈ میں شامل کیا گیاہے وہ بھی پہلی مرتبہ ٹسٹ اسکواڈ کا حصہ بنے ہیں۔ سیریز 15 رکنی پاکستانی اسکواڈ میں کپتان سرفرازاحمد،محمد حفیظ ،امام الحق،اظہرعلی ،حارث سہیل ، اسدشفیق، بابراعظم، یاسرشاہ، بلال آصف ،محمدعباس،حسن علی،فہیم اشرف ، میرحمزہ ، شاہین آفریدی اور سعد علی شامل ہیں۔
