اسلام آباد۔28اگسٹ(سیاست ڈاٹ کام)پاکستانی کے سابق آل راؤنڈر شاہد خان آفریدی نے انکشاف کیا ہے کہ روی شاستری نے انہیں بوم بوم کا لقب دیا تھا۔آفریدی نے 1996 میں 16 برس کی عمر میں ونڈے انٹرنیشنل کیریئر کا آغاز کیا تھا اور انہوں نے کیریئر کے دوسرے ہی میچ میں 37 گیندوں پر تیز ترین سنچری بناکر نئی تاریخ رقم کرتے ہوئے دنیا بھر میں شہرت حاصل کر لی تھی۔جارحانہ بیٹنگ انداز کی وجہ سے وہ دنیائے کرکٹ میں بوم بوم کے نام سے جانے جاتے ہیں تاہم انہوں نے انکشاف کیا کہ انہیں یہ لقب روی شاستری نے دیا تھا۔سماجی رابطوں کی ویب سائٹ ٹوئٹر پر مداحوں کے ساتھ سوال و جواب کے سیشن کے دوران انہوں نے انکشاف کیا کہ ہندوستانی ٹیم کے موجودہ کوچ روی شاستری نے انہیں بوم بوم کا لقب دیا تھا۔آفریدی نے مزید کہا کہ ٹیم کے سابق کپتان اور سوئنگ کے سلطان وسیم اکرم اور سابق عظیم آسٹریلین فاسٹ باؤلر بلین میک گرا ان کے پسندیدہ بولر ہیں۔