نئی دہلی ۔30 اگسٹ (سیاست ڈاٹ کام ) انگلینڈ کے خلاف پانچ میچوں کی ٹسٹ سیریز میں ہندوستانی ٹیم 2-1 سے پیچھے ہے اور ٹیم کو سیریز جیتنی ہے تو آخری دونوں ٹسٹ جیتنے ہوں گے۔ اس سیریز میں کپتان ویراٹ کوہلی نے شاندار بیٹنگ کی ہے اور اب تک دو سنچریاں بناچکے ہیں۔ سیریز میں اب تک کوہلی کے نام 440 رنز ہیں۔ انگلینڈ میں ایک سیریز میں سب سے زیادہ رنز بنانے کا ریکارڈ راہول ڈراویڈ ( 602) اور سنیل گواسکر( 542 ) ان سے آگے ہیں۔ ایسے میں کوہلی کا مقصد اس ریکارڈ کو توڑنا ہوگا۔دریں اثناء ویریندر سہواگ نے کہا ہے کہ اگر کوہلی اس ریکارڈ کو توڑتے ہیں تو ڈراویڈ اورگواسکر کو خوشی ہوگی۔ سہواگ نے ایک نیوز چینل سے بات چیت میں کہا کہ یہ راہول اور سنیل گواسکر کے ریکارڈ کیلئے کوئی بھی خطرے کی بات نہیں ہے اگر کوہلی ریکارڈ توڑتے ہیں تو یہ خوشی کی بات ہے۔ دونوں سینئروں کو بھی اتنی ہی خوشی ہوگی جتنی مجھے کرون نائر کے ٹریپل سنچری بنانے پر ہوئی تھی۔ میں خود چاہتا ہوں کہ وہ رنز بنائیں کیونکہ تبھی ٹیم سیریز جیتنے کیلئے بھی اپنا دعوی پیش کرپائے گی۔سہواگ نے کوہلی کی تعریف کرتے ہوئے مزید کہا کہ کوہلی نے بولروں ک مدد دینے والی پچ پر 97 اور 103 رنوں کی اننگز کھیلی ، اس لئے جب انہیں اگلے دو ٹسٹ میچوں میں بیٹنگ کیلئے مددگار پچوں پر بیٹنگ کرنے کا موقع ملے گا ، تو ہم امید کرسکتے ہیں کہ وہ سنچری نہیں بلکہ ڈبل سنچری لگائیں۔ وہ ایک سال میں پہلے ہی چھ ڈبل سنچریاں لگا چکے ہیں ، اس لئے میں امید کرتا ہوں کہ وہ ڈبل سنچری لگائیں اور ہو سکے تو ٹریپل سنچری بھی لگائیں۔ کیونکہ یہی کامیابی ہے جو ان کی فہرست میں ابھی تک نہیں ہے۔
