ٹوکیو ، 7 اپریل (سیاست ڈاٹ کام) ماسٹرز سویمنگ ٹورنمنٹ میں جاپان کی 100 سالہ خاتون میاکو نیگوکا نے شرکت کر کے سب کو حیران کر دیا۔ انہوں نے 1500 میٹر سویمنگ مقابلے میں مقررہ فاصلہ ایک گھنٹہ 15 منٹ 54.39 سکنڈز میں طے کیا۔ 1914ء کی پیدائش والی میاکو نے گھٹنے کی انجری سے نجات پانے کی غرض سے 82 سال کی عمر میں سویمنگ شروع کی تھی۔ ابتداء میں وہ اپنے متاثرہ گھٹنے کی ایکسرسائز کی وجہ سے سویمنگ پول جاتی رہیں۔ تاہم اس کے بعد انھوں نے سوئمنگ باقاعدہ طور پر سیکھی۔ فینا ماسٹرز ورلڈ چمپئن شپ میں 100 برس کی عمر میں تیراکی کرنے والی وہ جاپان کی عمر رسیدہ تیراک بن گئیں۔ انہوں نے 88 برس کی عمر میں ماسٹرز ورلڈ ایونٹ میں پہلی بار حصہ لیا تھا جہاں نیوزی لینڈ کے شہر کرائسٹ چرچ میں منعقدہ ایونٹ میں انھوں نے 50 میٹر بیک اسٹروک ایونٹ میں برونز میڈل حاصل کیا تھا۔ اس کے بعد انھوں نے 2004ء میں اطالوی شہر ریسونی میں منعقدہ ایونٹ میں تین مختلف کیٹیگریز میں سلور میڈلز اپنے قبضے میں کئے تھے۔ 90 برس کی عمر میں میاکو نے 800 میٹر فری اسٹائل ایونٹ میں نیشنل ریکارڈ بنا کر شہرت پائی تھی۔
