ماسکو۔4 جولائی(سیاست ڈاٹ کام )سویڈن نے ورلڈ کپ کے پری کوارٹر فائنل میچ میں سوئٹزرلینڈ کو سنسنی خیز مقابلے کے بعد 0-1 سے شکست دے کر 24سال بعد ورلڈ کپ کے کوارٹر فائنل میں پہنچنے کا اعزاز حاصل کر لیا۔ پری کوارٹر فائنل میچ میں سویڈن اور سوئٹزرلینڈ کے درمیان زبردست مقابلہ دیکھنے کو ملا اور دونوں ہی ٹیموں نے حریف کے گول پر تابڑ توڑ حملے کیے۔ پہلے ہاف میں سرتوڑ کوشش کے باوجود دونوں ٹیمیںگول کرنے میں ناکام رہیں لیکن دوسرے ہاف کے 66 ویں منٹ میں سویڈش کھلاڑی فورسبرگ نے شاندار فیلڈ گول کر کے ٹیم کو برتری دلائی جو میچ کے اختتام تک برقرار رہی۔سوئس کھلاڑیوں نے برتری ختم کرنے کے لیے بھرپور کوشش کی لیکن سویڈن کے مضبوط دفاع اور گول کیپر نے غیرمعمولی کارکردگی کا مظاہرہ کر کے اسے کامیاب نہ ہونے دیا اور سویڈن نے سوئٹزرلینڈ کو 1۔0 گول سے شکست دے کر ایونٹ سے باہر کر دیا اور کوارٹر فائنل میں پہنچنے کا اعزاز حاصل کر لیا۔سویڈن نے 24برس کے وقفے کے بعد ورلڈکپ کی آخری 8 ٹیموں میں جگہ بنانے کا اعزاز حاصل کیا جہاں اس سے قبل ٹیم نے آخری مرتبہ 1994 میں میگا ایونٹ کے کوارٹر فائنل میں جگہ بنائی تھی۔