برازیلیا28 جون (سیاست ڈاٹ کام)اٹلی کے ڈیفینڈر جورجیو چیلینی نے کہا ہے کہ ان کو کاٹنے پر یوروگوائے کے کھلاڑی سواریس پر چار ماہ کی پابندی بہت زیادہ ہے۔واضح رہے کہ فٹبال کے عالمی ادارے فیفا نے یوروگوائے کے مشہور کھلاڑی لوئس سواریس کو اطالوی کھلاڑی کو کاٹنے پر 9 میچوں کی پابندی، جرمانے اور چار ماہ تک فٹبال سرگرمیوں سے دور ہنے کی سزا سنائی ہے جو ایک ریکارڈ سزا ہے۔چیلینی نے کہا سواریس کے لئے میرے دل میں انتقام، غصہ یا ان کو ملنے والی سزا پر خوشی نہیں ہے۔سواریس کو ملنے والی سزا پر مشہور فٹ بالر میراڈونا نے کہا ہے کہ یہ سزا نہایت شرمناک ہے۔انھوں نے ایک ٹی وی شو میں کہا فیفا کی جانب سے دی گئی
سزا شرمناک ہے اور فیفا کو مداحوں کے جذبات کا کوئی خیال نہیں ہے۔ بس اس بات کی کسر رہ گئی تھی کہ سواریس کو ہتھکڑیاں پہنا دیتے اور گوانتانامو بھیج دیتے۔ٹی وی شو پر میراڈونا نے ٹی شرٹ پہن رکھی تھی جس پر درج تھا ’سواریس ہم تمہارے ساتھ ہیں‘۔سواریس فیفا ورلڈ کپ چھوڑ کر اپنے ملک واپس چلے گئے ہیں۔ وہ کاٹنے کے الزام کی تردید کرتے ہیں اور کہتے ہیں کہ چیلینی ان سے ٹکرائے تھے۔تاہم فیفا نے ان کو ملزم قرار دیتے ہوئے ان کی فٹ بال کی تاریخ میں سب سے سخت سزا سنائی۔اپنی ویب سائٹ پر لکھتے ہوئے چیلینی نے کہا میں ہمیشہ سے تادیبی کارروائی کے حق میں ہوں لیکن ساتھ ہی میرے خیال میں یہ سزا کافی زیادہ ہے۔انھوں نے مزید لکھا جو کچھ میدان پر ہوا اس کے حوالے سے نہ مجھے غصہ ہے، نہ انتقام کی آگ ہے اور نہ ہی خوشی ہے۔ مجھ میں صرف غصہ اور مایوسی میچ کے حوالے سے ہے۔ اس وقت میں سواریس اور اس کے خاندان کے بارے میں سوچ رہا ہوں جن کے لئے یہ بہت مشکل وقت ہے۔اس سزا کے بعد سواریس کو اسپانسر کرنے والی کمپنی 888پوکر نے اپنی اسپانسر شپ فوری طور پر منسوخ کردی ہے۔تاہم دوسری جانب بارسلونا فٹ بال کلب سواریس کو سائن کرنے کے لئے تیار ہے۔