لندن۔ 23 ستمبر (سیاست ڈاٹ کام) انگلینڈ نے سری لنکا کے خلاف ہونے والی ٹیسٹ سیریز کے لیے ٹیم کا اعلان کرتے ہوئے سرے کے بلے باز رورے برنز کو پہلی مرتبہ ٹیسٹ ٹیم میں شامل کیا ہے ۔رورے برنز پہلی بار سلیکٹرز کا اعتماد حاصل کرنے میں کامیاب رہے ، جنہیں اسٹار اوپننگ بلے باز ایلسٹرکک کی جگہ ٹیم میں شامل کیا گیا ہے ۔کک نے ہندستان کے خلاف کھیلے گئے آخری ٹیسٹ کے بعد انٹرنیشنل کرکٹ سے ریٹائرمنٹ کا اعلان کر دیا تھا۔ یہ 159 ٹیسٹ میچوں کے بعد پہلا موقع ہو گا کہ انگلینڈ کی ٹیم اپنے اسٹار اوپننگ بلے باز ایلسٹر کک کے بغیر میدان میں اترے گی جنہوں نے ریٹائر ہونے سے قبل 2006 سے 2018 تک لگاتار 158 ٹیسٹ میچ کھیل کر عالمی ریکارڈ بنایا تھا۔سری لنکا کے خلاف ٹیسٹ سیریز کے اعلان کردہ ٹیم میں جو ڈینلی اور اولی اسٹون کو بھی پہلی بار شامل کیا گیا ہے ۔کیٹن جیننگز ناقص کارکردگی اور فارم کے باوجود ٹیم میں جگہ برقرار رکھنے میں کامیاب رہے جبکہ جیک لیچ کی دوبارہ ٹیم میں واپسی ہوئی ہے ۔انگلش ٹیم دورہ سری لنکا کے دوران پانچ ون ڈے ، تین ٹیسٹ اور واحد ٹی ٹوئنٹی میچوں کی سیریز کھیلے گی۔اعلان کردہ ٹیم اس طرح ہے : کپتان جو روٹ، معین علی، جیمز اینڈرسن، جونی بیئرسٹو، رورے برنز، اسٹورٹ براڈ، جوز بٹلر، سیم کرن، جو ڈینلی، کیٹن جیننگز، جیک لیچ، اولی پوپ، عادل رشید، بین اسٹوکس، اولی اسٹون اور کرس ووکس ۔
