کینڈی ۔6 اگسٹ (سیاست ڈاٹ کام )جنوبی افریقہ نے سری لنکا کو 5 ونڈے میچوں کی سیریز کے تیسرے میچ میں باآسانی 78 رنز سے شکست دے کر سیریز میں 0-3 کی فیصلہ کن برتری حاصل کرلی۔کینڈی میں کھیلے گئے تیسرے میچ میں میزبان سری لنکا کے کپتان اینجلیو میتھیوز نے ٹاس جیت کر جنوبی افریقہ کو پہلے بیٹنگ کی دعوت دی۔جنوبی افریقہ کی جانب سے تجربہ کار اوپنر ہاشم آملہ نے ذمہ دارانہ مظاہرہ کیا اور کوئنٹن ڈی کوک کے ساتھ پہلی وکٹ کی شراکت میں 42 رنز بنائے تاہم ڈی کوک صرف 2 رنز جوڑ کر آؤٹ ہوئے۔ہاشم آملہ اور ہینڈرکس نے دوسری وکٹ میں اسکور کو 101 تک پہنچادیا، ہاشم آملہ 59 رنز کی اننگز کے بعد آؤٹ ہوئے جس کے بعد کپتان ڈیوپلیسی بھی 10 رنز کا اضافہ کرکے 137 کے مجموعے پر پویلین لوٹ گئے۔جے پی ڈومینی نے ہینڈرکس کا بھرپور ساتھ دیا اور اسکور کو 215 تک لے کر گئے اس دوران ہینڈرکس نے اپنی سنچری بھی مکمل کرلی۔ہینڈرکس نے 8 چوکوں اور ایک چھکے کی مدد سے 102 رنز بنائے جس کے بعد ڈومینی اور ڈیوڈ ملر نے 113 رنز کی شراکت قائم کی تاہم ڈومینی اپنی سنچری مکمل نہ کرپائے اور 92 رنز بنا کر پریرا کی گیند پر آؤٹ ہوئے۔ڈیوڈ ملر 51 رنز بنا کر پویلین لوٹے تو جنوبی افریقہ کا اسکور 340 رنز تھا جس کے بعد فیلوکوایو نے 24 رنز بنا کر مقررہ اوورز میں 363 رنز اسکورکئے۔سری لنکا کی جانب سے پریرا نے سب سے زیادہ 4 وکٹیں حاصل کیں اور 2 کھلاڑیوں کو کمارا نے آوٹ کیا۔میزبان ٹیم کو مشکل ہدف کے تعاقب میں 20 کے اسکور پر پہلا نقصان اٹھانا پڑا جب نیروشان ڈیکویلا 10 رنز بنا کر آوٹ ہوئے، اپل تھرنگا 20 رنز بنا کر آوٹ ہونے والے دوسرے بیٹسمین تھے۔کوسل پریرا نے 27 اور مینڈس نے 31 رنز بنا کر ٹیم کو ہدف کے قریب پہنچانے کی کوشش کی لیکن ایک بڑی شراکت قائم کرنے میں ناکام رہے جبکہ تھیسارا پریرا بھی 16 رنز بنا کر ٹیم کو مشکل میں چھوڑ کر پویلین لوٹ گئے۔کپتان میتھیوز نے نے دھنانجیا ڈی سلوا کے ساتھ کچھ مزاحمت کی تاہم 32 کے انفرادی اسکور پر شمسی کی بولنگ کا نشانہ بن گئے۔ڈی سلوا نے سب سے زیادہ 84 رنز بنائے لیکن ٹیم کو جیت دلانے میں ناکام ہوئے، اکیلا دنانجیا نے 37 رنز بنائے۔سری لنکا کی پوری ٹیم 45 ویں اوور کی دوسری گیند پر 285 رنز بنا کر آؤٹ ہوئی اور اسے 78 رنز سے شکست ہوئی۔جنوبی افریقہ نے اس کامیابی کے ساتھ 5 میچوں کی سیریز بھی 0-3سے اپنے نام کرلی۔دونوں ٹیموں کے درمیان سیریز کا چوتھا میچ 8 اگست کو کینڈی میں ہی کھیلا جائے گا۔خیال رہے کہ جنوبی افریقہ نے ٹسٹ سیریز میں ناکامی بعد ونڈے سیریز پر قبضہ کرلیا ہے۔
