سنچورین ۔7 مارچ (سیاست ڈاٹ کام ) جنوبی افریقہ نے رواں سیریز کے دوسرے ونڈے میں سری لنکا کو 113 رنز کے واضح فرق سے شکست دے کر 5 میچوں کی سیریز میں2-0 کی سبقت حاصل کرلی۔ سری لنکا کے کپتان لستھ ملنگا نے سنچورین میں ٹاس جیت کر میزبان جنوبی افریقہ کو پہلے بیٹنگ کی دعوت دی توکوئنٹن ڈی کاک اور ہینڈرکس نے 91 رنز کا شاندار آغاز فراہم کرکے ان کی حکمت عملی کو ناکام بنا دی۔ ہینڈرکس نے 41 گیندوں میں صرف 29 رنز بنائے تھے تاہم ڈی کاک نے جارحانہ کھیل کا مظاہرہ کرتے ہوئے 17 چوکوں اور ایک چھکے کی مدد سے صرف 70 گیندوں میں 94 رنز بنائے تاہم وہ اپنی سنچری مکمل نہ کرپائے اور پریرا کی گیند پر آوٹ ہوئے۔ کپتان فاف ڈیوپلیسی نے بھی ذمہ دارانہ مظاہرہ کرتے ہوئے 57 رنز بنائے اورپریرا نے ان کی وکٹیں اڑا دیں جس کے بعد ڈیوڈ ملر 25 رنز بنا سکے لیکن دیگر بیٹسمینس مہمان بولروں کا ڈٹ کر مقابلہ نہ کرسکے۔ سری لنکا نے ڈی کاک اورڈیوپلیسی کی جانب سے بہترین آغاز کو اپنے حق میں بدل کر نسبتاً ایک چھوٹے مجموعے تک محدود رکھا۔ جنوبی افریقہ کی پوری ٹیم 46 ویں اوور کی پہلی گیند پر 251 رنز بنا کر آوٹ ہوئی۔سری لنکا کی جانب سے پریرا نے سب سے زیادہ 3 وکٹیں حاصل کیں، ملنگا اور ڈی سلوا نے فی کس 2 کھلاڑیوں کو آوٹ کیا۔ بولروںکی جانب سے ملی جلی کارکردگی کے بعد سری لنکا کے بیٹسمینس شدید دباؤ میں نظر آئے اور پہلی ہی وکٹ 11 رنز پر گری جس کے بعد دوسری وکٹ 29 کے اسکور پر گری اور دونوں اوپنر ڈکویلا اور فرنانڈو پویلین لوٹ گئے۔ اوشادا فرنانڈو اورمینڈس نے اسکور کو 92 رنز تک پہنچایا لیکن مینڈس 24 کے انفرادی اسکور پر رن آوٹ ہوئے جس کے بعد مہمان ٹیم کی امیدیں دم توڑگئیں حالانکہ ڈی سلوا نے 15 اور پریرا نے 23 رنز بنا کر ہدف کی جانب پیش قدمی کی رفتار بڑھا دی تھی۔ عمران طاہر نے پریراکو134کے اسکور پر آوٹ کرکے اپنی ٹیم کی جیت کو یقینی بنادیا کیونکہ اس کے بعد سری لنکا کے باقی بیٹسمینس جلد ہی آوٹ ہوگئے۔ سری لنکا کی پوری ٹیم 33 ویں اوور میں 138 رنز پر ڈھیر ہوگئی ۔کوئنٹن ڈی کوک کو 94 رنز کی شان دار اننگز کھیلنے پر میچ کا بہترین کھلاڑی قرار دیا گیا۔خیال رہے کہ سری لنکائی ٹیم نے ٹسٹ سیریز میں جنوبی افریقہ کو تاریخی شکست دی ہے تاہم ایک ونڈے سیریز کے ابتدائی دونوں مقابلوں میں اسے شکست ہوئی ہے۔
