نئی دہلی ۔15 مارچ (سیاست ڈاٹ کام) ہندوستانی ٹیم کے سابق فاسٹ بولر ایس سری سنت پر سپریم کورٹ نے آئی پی ایل اسپاٹ فکسنگ معاملہ میں تا حیات پابندی ہٹا دی ہے۔ سپریم کورٹ نے کرکٹر سری سنت پر لگی تا عمر پابندی پر بی سی سی آئی کو دوبارہ غور کرنے کو کہا ہے۔ سری سنت پر اسپاٹ فکسنگ کے تحت تاحیات پابندی عاید کی گئی تھی لیکن اب سپریم کورٹ نے بی سی سی آئی کو تین مہینہ کے اندر اس پر پھر سے غور کرنے کی ہدایت دی ہے۔ سری سنت اس وقت اسپاٹ فکسنگ معاملہ میں ملوث ہونے کی وجہ سے تا عمر پابندی کا سامنا کر رہے ہیں۔ سری سنت کو مبینہ اسپاٹ فکسنگ سے متعلق مجرمانہ معاملہ میں عدالت زیریں 2015 میں الزامات سے بری کر چکی ہے۔ اس سے پہلے عرضی پر سماعت کے دوران سری سنت کی جانب سے دلیل پیش کی گئی تھی کہ بی سی سی آئی کے ذریعہ اس پر پابندی بہت سخت ہے اور اس دعوی کی حمایت کرنے کے لئے کوئی ثبوت نہیں ہے کہ وہ کسی غیر قانونی سرگرمی میں ملوث تھے۔ قابل غور ہے کہ کیرالہ ہائی کورٹ نے سری سنت پر بی سی سی آئی کے ذریعہ لگائی گئی تا عمر پابندی کو برقرار رکھا تھا۔ اسی فیصلہ کو سری سنت نے عدالت عظمی میں چلینج کیا تھا۔ بی سی سی آئی نے15 مئی 2018 کو سری سنت کی اس درخواست کی مخالفت کی تھی۔
