لاہور۔23 مارچ (سیاست ڈاٹ کام )ورلڈ کپ مہم تو پاکستان کرکٹ ٹیم کی ناکامی کے ساتھ اختتام کو پہنچیاور اب پاکستان کرکٹ بورڈ(پی سی بی) کو ونڈے کے نئے کپتان اور سلیکشن کمیٹی کے تقرر میں شدید مشکلات کا سامنا ہے۔پی سی بی کو مصباح الحق کی سبکدوشی کے بعد ونڈے ٹیم کے نئے کپتان کی تلاش ہے اور اس کے علاوہ دورہ بنگلہ دیش کے لئے ٹیم کا انتخاب بھی نئی سلیکشن کمیٹی ہی کرے گی ،جس کی تشکیل باقی ہے۔ چیئرمین شہریار خان نے صلاح مشورے شروع تو کر دیئے ہیں لیکن حتمی فیصلے پر پہنچنے میں انہیں دشواری کا سامنا ہے۔ اظہر علی اور سرفراز احمد نئے کپتان کے لئے مضبوط امیدوار بن گئے ہیں جبکہ اسد شفیق اور فواد عالم کے ناموں پر بھی غور کیاجا رہا ہے تاہم محمد حفیظ کو بورڈ کے اندر حمایت حاصل کرنے میں دشواری کا سامنا ہے۔ذرائع کا کہنا ہے کہ بورڈ چیف سلیکٹر کسی غیر معروف کرکٹر کو مقرر کرنے کا خواہش مند ہے۔
