لندن۔24 مئی (سیاست ڈاٹ کام )پاکستان کرکٹ ٹیم کے وکٹ کیپر کپتان سرفراز احمد نے کہا ہے کہ اپنی کارکردگی سے لارڈز ٹسٹ کو یادگار بنانا چاہتا ہوں۔ لارڈز میں سیریز کی ٹرافی کی نقاب کشائی کے بعد انہوں نے کہا کہ لارڈز پر پہلی مرتبہ نہیں کھیل رہا لیکن بطور کپتان یہاں ٹسٹ کھیلنا پہلا تجربہ ہے جسے اپنی کارکردگی کے ساتھ یادگار بنانے کی خواہش ہے۔سرفراز احمد نے اس بات کو تسلیم کیا کہ میزبان انگلش ٹیم مضبوط حریف ثابت ہو گی تاہم ہمیں یاد رکھنا چاہیے کہ حالیہ مہینوں میں انگلش ٹیم کی کارکردگی اچھی نہیں رہی۔انگلینڈ کو لارڈز میں ہرانے سے متعلق سوال پر سرفراز احمد نے کہا کہ شکست کا کڑوا گھونٹ بھی ہمیں پینا پڑ سکتا ہے جو کھیل کا حصہ ہے لیکن بطور کپتان میری خواہش ہے کہ ہماری ٹیم اچھی کرکٹ کھیلے۔موسم کے سوال پر سرفراز احمد نے کہا کہ ہمیں انگلینڈ آئے ہوئے کافی وقت گزر چکا لیکن کبھی ہم گرمی میں کھیلتے ہیں اور کبھی اتنی سردی میں میدان میں اترنا پڑتا ہے کہ جیبوں سے ہاتھ باہر نکالنے کا دل نہیں کرتا۔