جوں جوں موسم تبدیل ہوتا رہتا ہے، توں توں ہمارے لباس میں بھی نمایاں تبدیلی آتی رہتی ہے۔ جن میں ایک تبدیلی سوئٹروں کا استعمال بھی ہے۔ لباس کی مناسبت سے دیدہ زیب سوئٹروں کا استعمال ہماری شخصیت کو چار چاند لگادیتا ہے۔ خوش ذوق خواتین اس میں بھی تنوع کی تلاش میں ہوتی ہیں۔ جوں ہی گرم موسم کی تمازت دم اخیر پہ آتی ہے، بازار میں نت نئے انداز کے رنگ برنگے سوئٹر اور شالوں وغیرہ کی بہار آجاتی ہے۔ روزمرہ کے پہناووں کی طرح ان ملبوسات کا انتخاب بھی اپنی شخصیت، عمر اور لباس کی مناسبت سے کرنا چاہئے، کیونکہ ہم انہیں اپنے کپڑوں کے اوپر پہنتے ہیں۔ اس لیے ہمیں چاہئے کہ سوئٹر، مفلر اور شالوں کا انتخاب کرتے ہوئے اسے بھی ملحوظ رکھیں۔ اس کے رنگوں کا امتزاج نظروں کو بھلا معلوم ہونا چاہئے، بعض خواتین ایک ہی طرح کے سوئٹر استعمال کرتی ہیں، البتہ ان کے رنگوں میں تبدیلی کرتی رہتی ہیں۔
