تمام اشیاء کی ایک چھت کے نیچے دستیابی، عوام کو سہولیات کی فراہمی حکومت کا اہم مقصد: ہریش راؤ
سدی پیٹ۔/6فروری،( سیاست ڈسٹرکٹ نیوز) شہر سدی پیٹ میں 20 کروڑ کی لاگت سے تعمیر کردہ شاندار انٹیگریٹیڈ مارکٹ کا افتتاح سابق ریاستی وزیر و رکن اسمبلی سدی پیٹ ٹی ہریش راؤ ، ضلع کلکٹر کرشنا بھاسکر کے ہاتھوں عمل میں آیا۔ اس موقع پر ہریش راؤ نے بات کرتے ہوئے کہا کہ ترقی کا نام حفظان صحت ہے اور عوام کیلئے ضروری سہولیات فراہم کرنا حکومت کا اولین مقصد ہے۔ اس لئے چیف منسٹر کے سی آر کے احکامات کے مطابق دورِ نظام میں تعمیر کی گئی مونڈا مارکٹ کی طرز پر ریاست تلنگانہ کے تمام شہروں میں انٹیگریٹیڈ مارکٹ تعمیر کی جارہی ہے جس کا گجویل ، سوریا پیٹ کے علاقوں میں تعمیری کام جاری ہے۔ اس طرح سدی پیٹ میں 6 ایکڑ اراضی پر 20 کروڑ کی لاگت سے ماڈل انٹیگریٹیڈ مارکٹ تعمیر کی گئی ہے۔ انہوں نے بتایا کہ تلنگانہ ریاست میں ہی نہیں بلکہ ملک بھر میں پہلی ماڈل انٹیگریٹیڈ مارکٹ سدی پیٹ میں تعمیر کی گئی ہے جس کا آج افتتاح عمل میں آیا۔ انہوں نے کہا کہ اس مارکٹ میں ہر طرح کی ترکاری، پھل، پھول، مچھلی ، گوشت کے علاوہ سوپر مارکٹ جو تمام سہولیات بینکٹ ہال میں خریداروں کیلئے دوکانات قائم کئے گئے ہیں۔ ہریش راؤ نے بتایا کہ سابق مارکٹ میں ترکاری، گوشت ، مچھلی و دیگر اشیاء کی فروخت اور خریداری میں سخت دشواریوں کا سامنا ہوتا تھا، سڑکوں پر خریدوفروخت دیکھی جاتی تھی۔ اس طرح بارش کے موسم میں بھیگنے سے کئی مشکلات کا سامنا ہوتا تھا۔ لیکن آج عوام کی سہولیات کیلئے کے سی آر ویژن کامیاب ہوگیا ہے۔ مارکیٹنگ میں کئی تبدیلیاں آئی ہیں ، تمام اشیاء کو ایک ہی چھت کے نیچے فروخت کرنے اور خریدنے کیلئے انٹیگریٹیڈ مارکٹ کا تعمیر کیا جانا عوام کیلئے فلاح وبہبودی کا کام ہے۔ ہریش راؤ نے آج سدی پیٹ میں کئی ترقیاتی کاموں کا افتتاح کیا اور اس کے ساتھ چیف منسٹر ریلیف فنڈ کے چیکس متاثرین میں تقسیم کئے۔ اس پروگرام میں رکن پارلیمنٹ کے پربھاکر ریڈی، بلدیہ صدر نشین راجہ نرسو، مارکٹ کمیٹی چیرمین ویملا وینکٹ ریڈی، نائب صدر نشین اطہر پٹیل اور دیگر عہدیدار موجود تھے۔