نیویارک ۔24 (سیاست ڈاٹ کام ) امریکہ میں برازیل فٹبال فیڈریشن کے سابق صدر کو رشوت خوری کا جرم ثابت ہونے پر 4 سال قید کی سزا سنادی گئی۔تفصیلات کے مطابق نیویارک کی وفاقی عدالت نے برازیل فٹبال فیڈریشن کے سابق صدر جوز ماریا میرین کو فیفا رشوت کے مقدمہ میں 4 سال قید کی سزا سنادی۔ عدالت نے جوز ماریا میرین کو 12 لاکھ ڈالر جرمانہ اور 33 لاکھ ڈالر ہرجانہ ادا کرنے کا بھی حکم دیا۔86 سالہ جوز ماریا میرین پر فٹبال کے مختلف ٹورنمنٹس کے نشریاتی و اشتہاری حقوق فراہم کرنے کے عوض رشوت خوری کے الزامات ثابت ہوگئے تھے۔ نیویارک کے شہر بروکلین میں امریکی ڈسٹرکٹ جج پامیلا چین نے فیصلہ سناتے وقت ریمارکس دیے کہ وہ اس فیصلے کے ذریعہ مجرموں کو سخت پیغام دینا چاہتی ہیں کہ قانون سے کوئی بالاتر نہیں۔امریکی جیوری نے گزشتہ سال دسمبر میں میرین کو مجرم قرار دیا تھا۔
