ماسکو۔18 جون (سیاست ڈاٹ کام)فٹبال ورلڈکپ کا ابھی ابتدائی ہی مرحلہ ہے لیکن اس کے ممکنہ فاتح کا نام ایک مہینے پہلے ہی سامنے آگیا ہے۔جی ہاں واقعی، ویسے تو عام طور پر سٹے بازوں کی جانب سے ٹیموں کی ممکنہ کامیابی یا ناکامی کو مدنظر رکھ کر شرطیں لگائی جاتی ہیں لیکن اب 2018 چل رہا ہے اور دنیا مشین لرننگ اور آرٹی فیشل ٹیکنالوجی (اے آئی) میں بہت زیادہ پیشرفت کرچکی ہے۔اب ان دونوں ٹیکنالوجیز کی مددد سے ہی متعدد گروپس نے روس میں جاری فٹبال ورلڈکپ کے حوالے سے پیش قیاسیاں کردی ہیں۔ایک رپورٹ کے مطابق ان میں سے ایک جرمنی کی ٹیکنیکل یونیورسٹی کی تحقیقی ٹیم بھی ہے۔اس حوالے سے اس ٹیم نے مشین لرننگ ٹیکنالوجی اور کمپیوٹرز کو استعمال کرتے ہوئے ہر ٹیم کی جانب سے ہر میچ میں کیے جانے والے متوقع گولز کی پیش قیاسی بھی کردی ہے ۔اس پیش قیاسیوں کے لیے ٹیموں کی قابلیت اور انفرادی سطح پر کھلاڑیوں کی ماضی میں کارکردگی کو بھی مدنظر رکھا گیا اور سائنسدانوں نے ورلڈکپ کے فاتح کے طور پر کس ٹیم کا نام لیا ہے؟ ویسے یہ اتنا بھی غیرمتوقع نہیں کیونکہ یہ ٹیم ماضی میں بھی ایک مرتبہ چیمپئن بن چکی ہے اور وہ ٹیم ہے اسپین۔ جس کے تحقیقی ٹیم کے مطابق ورلڈکپ جیتنے کے امکانات 17.8 فیصد ہیں، جبکہ جرمنی دوسرے، برازیل تیسرے، فرانس اور بیلجیئم بالترتیب چوتھے اور 5 ویں نمبر پر ہیں۔تاہم تحقیقی ٹیم کے بموجب انہوں نے اسپین کو یقینی فاتح کے طور پرمنتخب نہیں کیا بلکہ یہ انتخاب ورلڈکپ مقابلوں کے اسٹرکچر کو دیکھتے ہوئے کیا گیا۔انہوں نے مزید کہا کہ اسپین کو جرمنی پر معمولی سبقت اس لیے حاصل ہے، کیونکہ موجودہ چیمپئن ٹیم کے حوالے سے اس بات کے امکانات بہت زیادہ ہیں کہ وہ کوارٹرفائنل تک نہیں پہنچ سکے گی، تاہم اگر وہ آخری 8 ٹیموں کے مرحلے میں پہنچتی ہے تو جرمن ٹیم اسپین کے مقابلے میں زیادہ پسندیدہ ہوجائے گی۔دوسری جانب فنانشنل کمپنی گولڈمین نے برازیل کو 2018 کے ورلڈ کپ مقابلے کا فاتح قراردیا ہے، جو کہ فائنل میں ممکنہ طور پر جرمنی کو شکست دے کر چیمپئن بنے گا۔اس کمپنی کے مطابق 2 لاکھ ڈیٹا ماڈلز اور پورے ورلڈکپ کے 10 لاکھ سمولیشن کے بعد یہ انتخاب کیا گیا۔مشین لرننگ ٹیکنالوجی نے ٹیموں اور کھلاڑیوں کی صلاحیت کے ساتھ ان کی ماضی کی کارکردگی کا تجزیہ کرکے یہ پیشگوئی کی۔ویسے دلچسپ بات یہ ہے کہ 2014 میں بھی اس کمپنی نے برازیل کی کامیابی کی پیش قیاسی کی تھی لیکن جرمنی نے کامیابی حاصل کی۔
