شارجہ۔15 اکٹوبر (سیاست ڈاٹ کام ) افغانستان پریمیئر لیگ (اے پی ایل) کے ایک میچ میں حضرت اللہ زازئی ایک ہی اوور میں 6 چھکے لگانے کا ریکارڈ بنانے والے کرکٹ کی تاریخ کے چھٹے بیٹسمین بن گئے۔شارجہ کرکٹ گراؤنڈ پر بلاخ لیجنڈز کے خلاف کابل زوانان کی جانب سے کھیلتے ہوئے میچ کی دوسری اننگز کے چوتھے ہی اوور میں یہ کارنامہ انجام دے کر 6 چھکے لگانے والے کھلاڑیوں کے کلب میں شامل ہوگئے۔6 چھکے لگانے کے ساتھ انہوں نے ٹی ٹوئنٹی کرکٹ میں تیز ترین نصف سنچری کا ریکارڈ بھی برابر کردیا جو ان سے سے قبل عظیم بیٹسمین یوراج سنگھ اور کرس گیل کے نام درج ہے۔ یوراج سنگھ نے2007 کے ورلڈ ٹی ٹوئنٹی میں انگلینڈ کے خلاف جبکہ کرس گیل نے بگ بیش لیگ (بی بی ایل) میں سڈنی اسٹرائکرز کے خلاف میلبرن رینیگیڈز کی جانب سے کھیلتے ہوئے2016 میں 12 گیندوں پر نصف سنچری اسکور کی ہے۔ حضرت اللہ زازئی نے بھی 12گیندوں پر نصف سنچری اسکور کی جبکہ میچ میں 17 گیندوں پر 62 رنز اسکور کئے۔ اپنے اس ریکارڈ کے بارے میں بات کرتے ہوئے حضرت اللہ زازئی نے کہا کہ میرے لیے یہ بہت ہی خوشی کی بات ہے کہ میں نے اپنی کارکردگی اپنے سب سے پسندیدہ کھلاڑی کرس گیل کے سامنے دی ہے۔ میں اپنا بہترین کھیل پیش کرنے کی کوشش کر رہا تھا اور میرے دماغ میں کسی ریکارڈ کے بارے میں خیال نہیں تھا۔خیال رہے کہ بین الاقوامی کرکٹ، فرسٹ کلاس اور لیگ کرکٹ میں جن کھلاڑیوں نے یہ کارنامہ انجام دیا ہے ان میں ویسٹ انڈیز کے سرگیری سوبرس اور کرس گیل، روی شاستری اور یوراج سنگھ، جنوبی افریقہ کے ہرشل گبز اور انگلینڈ کے روس وائٹلے شامل ہیں۔ واضح رہے کہ بلاخ لیجنڈز نے کابل زوانان کو جیت کے لیے 245 رنز کا ہدف دیا تھا لیکن ان کی ٹیم مقرر 20 اوورز میں صرف 223 رنز ہی بناسکی۔یہاں یہ بات قابلِ غور ہے کہ ٹی ٹوئنٹی کرکٹ میں ایک ہی اوور میں 6 چھکے لگانے والے یوراج سنگھ کی ٹیم کو فتح ہوئی جبکہ کرس گیل اور حضرت اللہ زازئی کو اسی میچ میں شکست کا سامنا کرنا پڑا۔
