کابل۔3 ستمبر (سیاست ڈاٹ کام) افغانستان کرکٹ بورڈ کی سلیکشن کمیٹی نے رواں ماہ ایشیاکپ کرکٹ ٹورنمنٹ کیلئے ٹیم کا اعلان کر دیا ہے اور ایونٹ کے لیے اسکواڈ میں چار اسپنرزکو میں شامل کیا گیا ہے۔افغانستان نے آئرلینڈ کے خلاف ونڈے سیریز میں فتح حاصل کرنے والے اسکواڈ میں چند تبدیلیاں کی ہیں اور فاسٹ بولر دولت زدران کو ایونٹ کے لیے ٹیم کا حصہ نہیں بنایاگیا۔وکٹ کیپر منیر احمد پہلی مرتبہ جگہ بنانے میں کامیاب رہے جبکہ اسپنر شرف الدین اشرف بھی پہلی مرتبہ افغان اسکواڈ میں شامل ہوئے۔ایشیا کپ 15 ستمبر کو متحدہ عرب امارات میں شروع ہو گا جس میں ہندوستانی ٹیم اپنے اعزاز کا دفاع کرے گی۔متحدہ عرب امارات کی وکٹوں کو دیکھتے ہوئے افغانستان نے اپنے17رکنی اسکواڈ میں 4 اسپنر راشد خان، مجیب الرحمان، شرف الدین اشرف اور محمد نبی کو شامل کیا ہے۔معلنہ ٹیم میں کپتان اصغر افغان، محمد شہزاد، جاوید احمدی، رحمت شاہ، سمیع اللہ شنواری، حشمت اللہ شاہدی، نجیب اللہ زدران، محمد نبی، گلبدین نائب، راشد خان، مجیب الرحمان، آفتاب عالم، احسان اللہ جنت، سید شیرزاد، وفادار اور منیر احمد کاکڑ پر مشتمل ہے۔
