ہریانہ۔13 نومبر (سیاست ڈاٹ کام ) بالی ووڈ اداکارہ راکھی ساونت کی جانب سے خاتون ریسلر کو ناچنے کا چیلنج کرنا مہنگا پڑگیا اورخاتون ریسلر نے مشتعل ہوکر اداکارہ کو اٹھا کر پٹک دیا جس پر انہیں دواخانہ جانا پڑگیا۔ تفصیلات کے مطابق اپنے متنازعہ بیانات کی وجہ سے خبروں میں رہنے والی اداکارہ راکھی ساونت کو خاتون ریسلر نے زخمی کرکے اسپتال پہنچا دیا۔ اداکارہ کے ساتھ یہ حادثہ صوبے ہریانہ کے شہر پنچکولا میں ہونے والے ریسلنگ مقابلے میں پیش آیا جہاں ایونٹ کی تشہیر کے لیے انہیں بھی مدعو کیا گیا تھا۔ ایونٹ کے دوران ایک غیرملکی خاتون ریسلر نے سب کو لڑنے کا چیلنج دیا جسے قبول کرتے ہوئے راکھی رنگ میں پہنچ گئیں۔ ریسلر خاتون نے ان سے لڑنے کی ہدایت دی لیکن راکھی نے یہ کہہ کر انکار کردیا کہ وہ ڈانسر ہیں ریسلر نہیں اور ڈانس میں مقابلہ کرنا چاہتی ہیں اور اس طرح راکھی نے الٹا خاتون ریسلر کو رقص کا چیلنج کردیا۔ دونوں خواتین کی جانب سے رقص کا مقابلہ شروع ہوا ہی تھا کہ اُس دوران دونوں کے درمیان تلخ جملوں کا تبادلہ ہوا اور پھر خاتون ریسلر نے اچانک ہی راکھی کو اُٹھا کر پٹک دیا جس کی تاب نہ لاتے ہوئے اداکارہ تکلیف سے بے تاب ہوگئی اور ان سے اٹھا بھی نہیں گیا۔ دو خواتین انہیں اٹھا کر لے گئیں اور انتظامیہ نے اداکارہ کو فوری اسپتال پہنچایا۔ اس واقعہ کے نتیجے میں راکھی ساونت کو کمر میں چوٹ آئی۔
