لزبن ۔25 مئی (سیاست ڈاٹ کام) چیمپئنس لیگ کے فائنل میں ہسپانوی فٹ بال کلب ریئل میڈرڈ نے ایک سنسنی خیز اور جذبات سے پْر ماحول میں اپنے حریف کلب ایتلیکٹو میڈرڈ کو 4-1 گول سے شکست دی ہے۔ پرتگال کے دارالحکومت لزبن میں گذشتہ شب کھیلے گئے چیمپئنس لیگ کے فائنل میں کامیابی کے ساتھ اسپین کے تاریخ ساز کلب ریال نے دسویں مرتبہ یہ پروقار خطاب اپنے نام کرنے کا اعزاز حاصل کر لیا ہے۔ ریئل نے کھیل کے اضافی وقت میں ایتلیکٹو کا مضبوط دفاع توڑ دیا اور یکے بعد دیگرے تین گول کر دیے۔کھیل کا پہلا گول ایتلیکٹو کی طرف سے گوڈین نے 35 ویں منٹ کیا اور نوے منٹ تک اپنی برتری برقرار رکھی۔
اس وقت ایسا محسوس ہو رہا تھا کہ ہسپانوی لیگ کی فاتح ایتلیکٹو میڈرڈ کی ٹیم یہ میچ جیت چکی ہے۔ جب مقررہ نوے منٹ کا کھیل مکمل ہوا تو ریئل کو پانچ منٹ کا (اسٹاپیج ٹائم) اضافی وقت ملا، جس میں راموس نے ایک عمدہ ہیڈ پر گول اسکور کر دیا جس کی وجہ سے یہ فائنل مقابلہ 30 منٹ کے اضافی وقت میں داخل ہو گیا۔اضافی وقت میں ریئل میڈرڈ نے توانائی سے بھرا مظاہرہ کرتے ہوئے اپنے حریف کلب کے گول پر حملے کرنا شروع کر دیے۔ کھیل کے 110 ویں منٹ میں بیل نے گول کر دیا
اور سنسنی خیز مقابلے میں پہلی مرتبہ برتری حاصل کرنے میں کامیاب ہو گیا۔ بیل اور رونالڈو نے مقررہ نوے منٹ کے دوران متعدد مرتبہ گول کرنے کے مواقع ضائع کئے ۔اس فائنل میچ میں ایک گول کے نقصان میں جانے کے بعد ایتلیکٹو نے اپنے تمام کھلاڑی ریئل کے ڈی ایریا میں روانہ کر دیے تاکہ گول کیا جا سکے لیکن اسی دوران 118 ویں منٹ میں ریال کے مارسیلیو نے ایک اور گول کر دیا۔ کھیل کے آخری منٹوں میں ریال کو پنالٹی کک ملی جس پر کرسٹیانو رونالڈو نے بھی گول کر دیا۔ ریال میڈرڈ کے کوچ کارلو انچیلوٹی نے بطور کوچ مجوعی طور پر تیسری مرتبہ چیمپئنس لیگ جیتنے کا اعزاز حاصل کیا ہے۔ 2003 ء اور 2007ء میں اے سی میلان کی کوچنگ کرتے ہوئے انہوں نے اس اطالوی کلب کو چیمپئنس لیگ کا خطاب جتوایا تھا۔ اٹلی سے تعلق رکھنے والے کارلو ایسے پانچویں کوچ بھی بن گئے ہیں جنہوں نے دو مخلتف کلبوں کی کوچنگ کرتے ہوئے انہیں چیمپئنس لیگ کے فائنل میں کامیابی دلوائی ہے۔
فاتح ٹیم کے کپتان اور گول کیپر کاسی آس نے بھی بطور کھلاڑی تیسری مرتبہ چیمپئنس لیگ کے تین خطابات جیتنے کا اعزاز حاصل کیا ہے۔ قبل ازیں 2000ء اور 2002 میں جب ریئل نے اس ٹورنمنٹ میں فتح حاصل کی تھی تو وہ اسی ٹیم کی نمائندگی کر رہے تھے۔