ویلنگٹن۔2 مارچ(سیاست ڈاٹ کام) ورلڈ کپ میں سری لنکا کے خلاف انگلش نوجوان بیٹسمین 24 سالہ جو روٹ ورلڈ کپ میں سنچری بنانے والے انگلینڈ کے سب سے نو عمر کھلاڑی بن گئے جو ان کی ورلڈ کپ میں پہلی سنچری بھی بنی ، انگلینڈ کے سابق کپتان کیون پیٹرسن ورلڈ کپ میں دو سنچریاں بنانے کا اعزاز رکھتے ہیں۔ ونڈے میں وہ سب سے زیادہ 4 سنچریاں بنانے والے انگلش پلیئر بھی بنے۔ ان سے پہلے ایلن لیمب 3 سنچریوں کے ساتھ سر فہرست تھے۔ جو روٹ اور جیمز ٹیلر کے درمیان 5 ویں وکٹ پر 98 رنز کی ریکارڈ شراکت اب تک ورلڈ کپ کی سب سے بڑی پارٹنرشپ ہے۔ 2014 سے اب تک جو روٹ انگلینڈ کی جانب سے سب سے زیادہ رنز بنانے والے کھلاڑی بھی بن گئے۔ دوسری جانب سری لنکا کے تلکرتنے دلشان نے گیری بیلینس کی وکٹ لے کر اپنے کیرئر کی 100 وکٹیں پوری کرلیں۔ وہ ونڈے میں وکٹوں کی سنچری مکمل کرنے والے سری لنکا کے 15 ویں کھلاڑی ہیں ، سری لنکا کی جانب سے ون ڈے کیرئیر میں 9000 سے زائد رنز اور 100 سے زیادہ وکٹیں لینے والے تلکا رتنے دلشان دوسرے کھلاڑی بن گئے۔ پہلے نمبر پر آل راؤنڈر جے سوریا 320 وکٹوں اور 13364 رنز کے ساتھ پہلے مقام پر ہیں۔
