میڈرڈ۔18 جون (سیاست ڈاٹ کام) پرتگال کے اسٹار فٹبالر کرسٹیانو رونالڈو کے ٹیکس چوری کے مقدمے میں ہسپانوی حکام کے معاملات طے پا ئے ہیں اور انہوں نے 2 سال کی معطل شدہ سزا تسلیم کرتے ہوئے جرمانہ ادا کرنے کی حامی بھر لی ہے۔ریئل میڈرڈ کی نمائندگی کرنے والے پرتگالی اسٹار پر الزام ہے کہ انہوں نے گزشتہ سال جون میں تقریباً 15ملین ڈالر کا ٹیکس دھوکہ دیا ہے۔رونالڈو جب گزشتہ مرتبہ عدالت میں پیش ہوئے تھے تو انہوں نے ٹیکس چوری کے الزامات قبول کرنے سے انکار کردیا تھا لیکن اس وقت معاملات طے نہیں ہو سکے تھے اور مقدمے کی سماعت ملتوی کردی گئی تھی۔رونالڈو پر الزام تھا کہ انہوں نے ٹیکس بچانے کے لیے ورجن آئی لینڈ اور آئرلینڈ جیسے مقامات پر موجود کمپنیوں کا استعمال کیا کیونکہ ان ملکوں میں قوانین کے تحت کم ٹیکس ادا کر کے چھوٹ حاصل کی جا سکتی ہے جبکہ اس کے ساتھ ان پر یہ بھی الزام تھا کہ انہوں نے اپنی تصاویر کے حقوق سے حاصل ہونے والی آمدنی بھی ٹیکس حکام سے چھپائی۔اس کے علاوہ بھی ان پر مختلف مواقع پر اپنے اثاثوں کی صحیح تفصیلات ظاہر نہ کرنے اور ٹیکس چوری کے الزامات عائد کیے جاتے رہے ہیں جسے رونالڈو یکسر مسترد کرتے رہے ہیں۔رونالڈو کو 21ماہ جیل کی سزا سنائی گئی ہے لیکن جس فرد کا مجرمانہ ریکارڈ نہ ہو، اسے ہسپانوی قوانین کے مطابق 2 سال سے کم کی سزا پر جیل نہیں بھیجا جا سکتا۔اسپین کے مالیاتی حکام اور پانچ مرتبہ بیلن ڈی اور جیتنے والے رونالڈو کے مشیر کے درمیان معاملات طے پا ئے ہیں جس کے تحت رونالڈو کو 20ملین ڈالر جرمانہ ادا کرنا ہو گا۔رونالڈو ابتدائی طور پر صرف 5.7ملین ڈالر ادا کریں گے جبکہ باقی رقم سود اور جرمانوں کی مد میں وقتاً فوقتاً ادا کی جاتی رہے گی۔دو سال قبل عدالت نے رونالڈو کے حریف اور ارجنٹینا کے اسٹار لیونل میسی کو بھی ٹیکس دھوکہ دہی کے جرم میں یکساں سزا دینے کے ساتھ 20لاکھ یورو جرمانہ عائد کیا گیا تھا۔
